ბათუმის ჯაზ-ფესტივალის ფარგლებში მაყურებლის წინაშე ახალგაზრდა, ექსცენტრიული შემსრულებელი Nik West საკუთარ ჯგუფთან ერთად წარსდგა. ფესტივალის პროგრამაში შეტანილი ცვლილებების გამო, ვესტმა ჯეიმი კალუმის შოუ ჩაანაცვლა, რის გამოც ბათუმის ჩოგბურთის კორტებზე მსმენელის ნაკლებობა აღინიშნებოდა, თუმცა მომღერალმა ენერგიული და მხიარული შოუ მოუწყო დამსწრე საზოგადოებას.

ნიკ ვესტი ახალგაზრდა ამერიკელი ბასისტი, კომპოზიტორი და მომღერალია, რომელიც არაორდინარული გარეგნობითა და საოცარი ექსპრესიით გამოირჩევა. ლეგენდარული შემსრულებლის, პრინცის, მუსიკალურ ოჯახში აღზრდილი ნიკი მუსიკას ადრეულ ასაკში ეზიარა.

კარიერის განმავლობაში ის უკრავდა პრინცთან, ჯონ მაიერთან, მარკუს მილერთან და სხვა მრავალ ცნობილ შემსრულებელთან ერთად. ნიკ ვესტი ფენდერის ბას გიტარების სერიის - Dimencion Bass-ის სახეა, რომელსაც ფენდერი 2013 წლიდან აწარმოებს.

სამთავრობო პროექტ Chek in Georgia-ს ფარგლებში მიმდინარე მე-10 საიუბილეო ჯაზ-ფესტივალი კი ისევ გრძელდება. დღეს მაყურებლის წინაშე Chris Brown-ს ნაცვლად Busta Rhymes წარსდგება. პროგრამული ცვლილების მიზეზი ვარსკვლავების თხოვნა გახდა, თურქეთში მიმდინარე მოვლენების გამო, მათ კონფლიქტურ რეგიონში ჩასვლას თავი აარიდეს.

მაყურებელს კორტების ტერიტორიაზე შესვლა საღამოს 8 საათიდან შეეძლება. კონცერტი კი მოგვიანებით, დაახლოებით 10 საათისთვის დაიწყება. ჯაზ-ფესტივალი 24 ივლისს მეისი გრეისMacy Grey-ის კონცერტით დაიხურება. მომღერალი სხვა ვარსკვლავებთან შედარებით ადრე ჩამოფრინდა, ის უკვე ბათუმში იმყოფება.

ბათუმის კორტებზე Nik West-ის კონცერტი გაიმართა

ფოტო: თამუნა გეგიძე / on.ge