სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. ამის შესახებ ინფორმაცია სირიის საგარეო საქმეთა სამინსიტროს ვებგვერდზეა გამოქვეყნებული. განცხადებაში წერია, რომ აფხაზეთმა და ოსეთმა სირიის წინააღმდეგ მიმართული ტერორისტული აგრესია აღიარეს, სწორედ ამიტომ, მადლობის ნიშნად, სირიამ ისინი დამოუკიდებელ სახელმწიფოებად აღიარა. უწყების განცხადებით, აღიარება დიპლომატიური ურთიერთობების, საელჩოების დონეზე დამყარდება.

აღნიშნულთან დაკავშირებით On.ge დაუკავშირდა საქართველოს საგარეო საქმეთა სამინისტროს უწყებაში ამბობენ, რომ საპასუხო განცხადებას მალე გაავრცელებენ.

აღიარების შესახებ ინფორმაციას ავრცელებენ სამხრეთ ოსეთის და აფხაზეთის დე-ფაქტო რესპუბლიკებიც.

"სამხრეთ ოსეთის საგარეო საქმეთა სამინისტროს, რომელიც ხელისუფლებისგანაა უფლებამოსილი, აქვს პატივი განაცხადოს, რომ სამხრეთ ოსეთის რესპუბლიკამ და სირიის არაბულმა რესპუბლიკამ დაადასტურეს საკუთარი ვალდებულება საერთაშორისო სამართლის ფუნდამენტური პრინციპებისადმი", - წერს დე-ფაქტო სამხრეთ ოსეთის საგარეო საქმეთა სამინისტრო.

დე-ფაქტო აფხაზეთის საგარეო საქმეთა სამინისტრო კი წერს, რომ სირიის და აფხაზეთის დიპლომატიური ურთიერთობები მათი საერთო მიზნისთვის სწრაფვას გამოხატავს.

სირიის პრეზიდენტს, ბაშარ ალ-ასადს, სამოქალაქო ომის პერიოდში, რუსეთი ყოველთვის მხარს უჭერდა. პუტინი სირიის ომში კიდევ უფრო აქტიურად მაშინ ჩაერთო, როცა ასადი სამხედრო და ეკონომიკური კუთხით დასუსტდა. რუსული ავია ბომბები ხვდება ისლამური სახელმწიფოს მებრძოლებს, თავდასხმები ასევე ხორციელდება დასავლეთის მიერ მხარდაჭერილ სირიის თავისუფალ არმიასა და მშვიდობიან მოქალაქეებს.

სამხრეთ ოსეთის და აფხაზეთის დე-ფაქტო რესპუბლიკა მანამდე აღიარა რუსეთმა, ნიკარაგუამ, ნაურუმ და ვენესუალამ.