მუსიკოსმა ლონდონიდან, ჯეიმს ბლეიქმა, ახალი სიმღერა გამოუშვა, სახელწოდებით Don't Miss It [არ გამოტოვო]. სიმღერის პრემიერა 24 მაისის ღამეს, BBC რადიოს ეთერში შედგა.

სიმღერის შესაქმნელად, რომელიც პიანოს მელოდიით იწყება, ბლეიქისა და ინგლისის ელექტრონული დუეტის Mount Kimbie-ის კოლაბორაცია შედგა.

სიმღერაში ოპერისა და სევდიანი ვოკალის ეფექტები ერთმანეთშია შერწყმული, ხანდახან კი, თითქოს სადღაც გარბის. Don't miss It მეორე სოლო სიმღერაა 2016 წლის ალბომის, The Colour In Everything-ის, შემდეგ. 2018 წლის იანვარში ბლეიქმა ახალი სინგლი If The Car Beside You Moves Ahead გამოუშვა.

Don't Miss It-ში ბლეიკი სამყაროსგან გარიყვასა და განცალკევებულად დგომაზე მღერის: I could avoid going outside, I could avoid wasting my life [თუ გარეთ არ გავალ, ცხოვრებას არ გავფანტავ], ამას კი მოჰყვება ის ყველაფერი, კარგიც და ცუდიც, რასაც ის "თავიდან აიცილებს". Don't miss it, like I did [არ გამოტოვო ეს ყველაფერი, ჩემსავით] მღერის ბლეიკი სიმღერის დასასრულს.

ვიდეოში, პარალელურად ვხედავთ სიმღერის ტექსტს, რომელიც მობილურში რეალურ დროში იკრიფება და შეგრძნებას ტოვებს, რომ ჯეიმს ბლეიქის ფიქრებიც ისეთივე მელოდიურია, როგორც მისი შემოქმედება.