თბილისის მერიის ცნობით, საქართველოს დემოკრატიული რესპუბლიკის 100 წლის იუბილეს აღსანიშნავად, თბილისში მდებარე ისტორიულ შენობებზე ხელნაკეთი კერამიკული აბრები განთავსდა.

აბრები ინგოროყვას #1 და #8-ში, 9 აპრილის ქუჩის #3/5-სა და ალექსანდრე პუშკინის #3-ში არსებულ ისტორიულ შენობებზე განთავსდა.

აბრებზე დატანილი ინფორმაცია კონკრეტული შენობის ისტორიის მნიშვნელოვან მომენტებს ასახავს.

საინფორმაციო აბრები ძველ თბილისში იმ სახლებზე განთავსდა, რომლებიც საკუთარი ისტორიით საქართველოს პირველ რესპუბლიკასთანაა დაკავშირებული. იმ შენობებზე, სადაც 1918-1921 წლებში, საქართველოს პირველი რესპუბლიკის მნიშვნელოვანი სახელმწიფო დაწესებულებები იყო განთავსებული, ან მათში იმ პერიოდის თვალსაჩინო სახელმწიფო, საზოგადო თუ კულტურის მოღვაწეები ცხოვრობდნენ, ან მოღვაწეობდნენ.

"ეს არის ქართული თიხისგან დამზადებული კერამიკული ფილები, რომელიც ვფიქრობ, მიმზიდველი იქნება, როგორც ტურისტებისთვის, ასევე ჩვენი მოქალაქეებისთვის. ეს არის საპილოტე პროექტი, რომლის პირველ ეტაპზე, აბრა ოთხ შენობაზე განთავსდა. შემდეგ ეტაპზე კი, ისტორიულ უბნებში, ყველა პირველ ნომერზე იქნება აბრეშუმის გზის სიმბოლიკებით აღნიშნული ისტორიული აბრა, სადაც ქუჩის პირველად სახელთან ერთად, მისი ისტორია იქნება მოთხრობილი", - განაცხადა მერიის კულტურის საქალაქო სამსახურის უფროსმა სოფიო ხუნწარიამ.

აბრებით ისტორიული ქუჩების ყველა პირველი ნომრის აღნიშვნის იდეა თბილისის ჰამქრის წარმომადგენელს, ხელოვნებათმცოდნე ცირა ელისაშვილს გაუჩნდა, ხოლო პროექტი თბილისის მერიის ხელშეწყობით სახელოსნომ - CERRAMIC ROOM განახორციელა.