რუსეთის პრეზიდენტმა, ვლადიმერ პუტინმა, სახელმწიფო დუმას რუსეთის ფედერაციისა და ოკუპირებული აფხაზეთის გაერთიანებული სამხედრო ძალების შექმნის შესახებ წინადადება რატიფიცირებისთვის წარუდგინა. დოკუმენტი 2016 წლის 16 ივლისს დარეგისტრირდა.

პუტინის მიერ წარდგენილი კანონპროექტის თანახმად, ორი მხარე ერთობლივი სამხედრო ძალებით მაშინ დაიწყებს მოქმედებას, როდესაც ხელშეკრულების რომელიმე მონაწილე რაიმე ტიპის აგრესიის, ან სამხედრო უშიშროების დარღვევის საფრთხის წინაშე დადგება.

როგორც კანონპროექტის განმარტებით ბარათში წერია, ზემოაღნიშნული შემთხვევების დროს შესაბამის დირექტივებს ორი მხარის შეიარაღებული ძალების გენერალური შტაბის უფროსები გასცემენ. გაერთიანებულ სამხედრო ძალებში შედის: რუსეთიდან - აფხაზეთის ტერიტორიაზე დისლოცირებული რუსეთის გაერთიანებული სამხედრო ბაზა, ხოლო აფხაზეთიდან - ორი ცალ-ცალკე მდებარე მოტომსროლელთა ბატალიონი, საარტილერიო და საავიაციო დაჯგუფებები, ასევე სპეციალური დანიშნულების მქონე სამხედრო რაზმი.

რუსეთის პრეზიდენტის ინიციატივის თანახმად, მშვიდობიან დროს გაერთიანებული სამხედრო ძალების ორგანიზებას ორივე მხრიდან წარმოდგენილი ოპერატიული ჯგუფი განახორციელებს, რომლის მეთაურიც რუსეთის გაერთიანებული სამხედრო ბაზის ხელმძღვანელი იქნება. საფრთხისა და ომის დროს კი, აღნიშნულ სამხედრო ძალებს გაერთიანებული ჯგუფის მეთაური უხელმძღვანელებს, რომელსაც, თავის მხრივ, რუსეთის თავდაცვის სამინისტრო დანიშნავს.

ამასთან, ინიციატივის თანახმად, გადაწყვეტილებას ამ სამხედრო დანაყოფების განლაგებასთან დაკავშირებით, ორივე მხარის თავდაცვის სამინისტროები მიიღებენ. სამხედრო დანაყოფების მიერ მოქმედების დაწყების შესახებ გადაწყვეტილებას კი ორი მხარის მთავარსარდლები მიიღებენ.

გარდა ამისა, მშვიდობის დროს მხარეები დამოუკიდებლად უზრუნველყოფენ სამხედრო დანაყოფების მატერიალურ-ტექნიკურ უზრუნველყოფას, ხოლო გაერთიანებული სამხედრო დანაყოფების რუსულ სტანდარტებამდე სრულად მისაყვანად ჩატარებული მატერიალურ-ტექნიკური ღონისძიებების ხარჯებს რუსეთი აიღებს თავის თავზე.

განმარტებითი ბარათის თანახმად, აღნიშნული ინიციატივის ვადა ზემოაღნიშნულ ორ მხარეს შორის 2014 წლის მოკავშირეობისა და სტრატეგიული პარტნიორობის შესახებ ხელშეკრულების ვადებს მოიცავს, რომელიც 10 წლით არის განსაზღვრული (აღნიშნული ვადის გასვლის შემდეგ, ის ავტომატურად შეიძლება გაიზარდოს 5-5 წლით).