ყოფილი რუსი ჯაშუშის სერგეი სკრიპალის, შვილი იულია სკრიპალი, რომელიც 4 მარტს სოლსბერიში მამასთან ერთად მოწამლეს, ჟურნალისტებს პირველად ესაუბრა.

ლონდონში, საიდუმლო ადგილას ყოფნისას იულიამ Reuters-ისთვის მიმართვა გააკეთა. კამერის წინ მან რუსულად ისაუბრა და ჟურნალისტებს მიმართვის ტექსტი ორ ენაზე მიაწოდა, კითხვებზე პასუხის გაცემაზე კი უარი თქვა.

იულია სკრიპალი მიმართვაში ამბობს, რომ მოწამვლის შემდეგ გამოჯანმრთელების პროცესი იყო ხანგრძლივი და მტკივნეული:

"თავის მხრივ შემაშფოთებელია ნერვო-პარალეპტიკური გაზის გამოყენება. არ მინდა დეტალებში ჩავიდე, მაგრამ ერთს ვიტყვი, რო, მკურნალობა იყო ინვაზიური, მტკივნეული და ღრმად დამთრგუნველი".

სკრიპალი, ასევე, აღნიშნავს, რომ რუსეთში დაბრუნების იმედი აქვს, მაგრამ როდის მოხდება ეს არ დაუზუსტებია:

"მადლობას ვუხდი რუსეთის საელჩოს დახმარების შემოთავაზებისთვის, მაგრამ მზად არ ვარ და არ მსურს მისი გამოყენება".

სერგეი სკრიპალი საავადმყოფოდან 18 მაისს გაწერეს, იულია კი ერთი თვით ადრე, 9 აპრილს.

ბრიტანეთის პრემიერ-მინისტრმა, ტერეზა მეიმ სკრიპალების მოწამვლის საქმეში რუსეთი დაადანაშაულა. მეის განმარტებით, რუსეთმა მოსაწამლად ნერვო-პარალეპტიკური ნივთიერება ნოვიჩოკი გამოიყენა.

განცხადებიდან მალევე მეიმ თქვა, რომ ქვეყნიდან 23 რუს დიპლომატს გააძევებდა. ბრიტანეთის გადაწყვეტილებას შეუერთდა აშშ და ევროკავშირის წევრი სახელმწიფოების უმეტესობა.

ამ დროისთვის, სხვადასხვა ქვეყნებიდან გაძევებული რუსი დიპლომატების რიცხვი 150 ადამიანს გაუტოლდა. რუსეთმა ბრალდებები უარყო და საპასუხოდ სხვადასხვა ქვეყნის დიპლომატების გაძევება დაიწყო.

რუსეთის საელჩოს პასუხი

დიდ ბრიტანეთში რუსეთის საელჩო იულია სკრიპალის მიმართავს გამოეხმაურა. მათი თქმით, იულია წინასწარ დაწერილ ტექსტს კითხულობს, რომელიც ჯერ ინგლისურად დაიწერა და შემდეგ ითარგმნა რუსულად. მათივე თქმით, ტექსტი სკრიპალის დაწერილი არაა.

საელჩოს განმარტებით, მათ აქვთ საფუძვლიანი ეჭვი, რომ იულია სკრიპალი მისი სურვილის საწინააღმდეგოდ ჰყავთ დაკავებული. განცხადებაში ნათქვამია, რომ დიდი ბრიტანეთი ვალდებულია დაამტკიცოს, რომ იულია განცხადებას ზეწოლის ქვეშ არ აკეთებს.