აშშ-ს სახელმწიფო დეპარტამენტის ინფორმაციით, აშშ-ს გამოძიების ფედერალური ბიურო უკრაინელი ჟურნალისტის, პაველ შერემეტის მკვლელობის გამოძიებაში მონაწილეობას მიიღებს. ამის შესახებ ამერიკის შეერთებული შტატების სახელმწიფო დეპარტამენტის წარმომადგენელმა, ჯონ კირბიმ განაცხადა:

"ჩვენ დამწუხრებულები და შოკირებულები ვართ Ukrainskaia Pravda-ს ჟურნალისტის, პაველ შერემეტის მკვლელობის გამო. შერემეტი თავისი სიმამაცითა და შეუპოვრობით სამაგალითო ჟურნალისტი იყო რეგიონში. ის თამაშობდა გადამწყვეტ როლს უკრაინის დემოკრატიაში, მუშაობდა რა მოსახლეობისათვის მნიშვნელოვან საკითხებზე, მათ შორის კორუფციასა და მმართველობაზე".

კირბიმ ასევე განაცხადა, რომ შერემეტის მკვლელობა თავისუფალ და დემოკრატიულ საზოგადოებაში არ უნდა მომხდარიყო. მან მხარი დაუჭირა უკრაინის საგამოძიებო უწყებას, ხოლო აშშ-ს გამოძიების ფედერალური ბიურო გამოძიების პროცესში უკვე ჩაერთო.

უკრაინაში მცხოვრები პაველ შერემეტი 20 ივლისს კიევში, მანქანაში ააფეთქეს.