Ekhokavkaza-ს ინფორმაციით, დღეს დილას კიევში ჟურნალისტი პაველ შერემეტი მანქანაში ააფეთქეს, რის შედეგადაც ის გარდაიცვალა. გამოცემა Ukrainskaia Pravdas-ს ცნობით, სადაც შერემეტი მუშაობდა, შემთხვევა მაშინ მოხდა, როდესაც ჟურნალისტი სამსახურში მიდიოდა.

ავტომობილი, რომელშიც შერემეტი იჯდა, გამოცემის ხელმძღვანელს, ალიონა პრიტულეს ეკუთვნოდა, რომელიც თავად ავტომობილში არ იმყოფებოდა. ამ დროისთვის უცნობია მკვლელობის მოტივი, თუმცა სამართალდამცავი უწყებები უკვე მუშაობენ ამ საკითხზე.

მანქანა, რომელშიც 20 ივლისს ჟურნალისტი პაველ შერემეტი ააფეთქეს.

ფოტო: Ukrainskaia Pravda

პაველ შერემეტი 44 წლის რუსი, უკრაინელი და ბელორუსი ჟურნალისტი იყო. ჟურნალისტის კარიერა მან ბელორუსიის ტელევიზიაში დაიწყო. 1998-2008 წლებში რუსეთის პირველ არხზე სპეციალურ კორესპონდენტად მუშაობდა. მას მიჰყავდა პროგრამა Vremia და იყო რამდენიმე დოკუმენტური ფილმის ავტორი. ბოლო წლების განმავლობაში ცხოვრობდა და მუშაობდა კიევში.

შერემეტი ასევე ხშირად სტუმრობდა რადიო თავისუფლებას, სადაც უკრაინასა და რუსეთში მიმდინარე პოლიტიკურ პროცესებზე, ყირიმის და დონბასის კრიზისსა და უკრაინაში ჩასატარებელ რეფორმებზე საუბრობდა.