თეთრი ხმაურის მოძრაობის ერთ-ერთი წევრის, ბექა წიქარიშვილის თქმით, 13 მაისს აქციის მიმდინარეობისას შინაგან საქმეთა მინისტრმა, გიორგი გახარიამ უთხრა, რომ კონტრაქციის მონაწილეებზე კონტროლი უჭირდა. მისივე თქმითვე, მინისტრმა მათ უთხრა, რომ შესაძლო იყო დარბევა გამხდარიყო საჭირო. ამის შესახებ აქტივისტმა TV პირველის ეთერში ისაუბრა.

ჟურნალისტის კითხვაზე - ეს ნიშნავდა თუ არა იმას, რომ მათ უნდა აეღოთ პასუხისმგებლობა კონტრაქციის დარბევაზე - წიქარიშვილმა ასე უპასუხა:

ჩემთვის პირადად ეს იქნებოდა საკმაოდ მძიმე სანახავი. გარდა ამისა, ამ დარბევას შეიძლება მოჰყოლოდა კიდევ უფრო მეტი დაპირისპირება, ესკალაცია და გართულება სიტუაციის. პირველი ამოცანა ჩემთვის იდგა ის, რომ რაღაცნაირად გადაგვერჩინა როგორც ჩვენი აქციის მონაწილეების უსაფრთხოება, ასევე ვერანაირად ვერ ვიქნებოდი მათი დარბევის მომხრე, რადგან დარბევის წინააღმდეგ დავიწყეთ, ფაქტობრივად, ჩვენი აქცია".

მისი თქმით, კონტრაქციის მონაწილეები შეცდომაში არიან შეყვანილი.

ბასიანსა და გალერიში სპეცოპერაციის შემდეგ დაგეგმილი აქცია 13 მაისს თბილისში, პარლამენტის შენობის წინ მიმდინარე აქცია მას შემდეგ დაიშალა, რაც აქციის ორგანიზატორების შინაგან საქმეთა მინისტრს ესაუბრნენ და შემდეგ მან იქ შეკრებილ ხალხს მიმართა. მანამდე მთელი დღის განმავლობაში კონტრაქციის წარმომადგენლები, რომლებიც ნეონაცისტური იდეების ირგვლივ არიან გაერთიანებული, პარლამენტის წინ მიმდინარე აქციასთან მიახლოებას ცდილობდნენ.

გაიგეთ მეტი 12 და 13 მაისს თბილისში მიმდინარე აქციებზე.