ბასიანის დამფუძნებელი, პარლამენტთან გამართული აქციის ერთ-ერთი ორგანიზატორი ნაჯა ორაშვილი აქციის დაშლისა და შს მინისტრთან გამართული მოლაპარაკებების შესახებ სოციალურ ქსელში წერს.

ნაჯა ორაშვილის თქმით, მისთვის კონტრაქციის მონაწილეების ძალადობრივი მეთოდებით დასჯა და საზოგადოების გახლეჩა მიუღებელია.

"სწორედ ამიტომ ვთხოვდით პოლიციას მთელი დღის განმავლობაში, რომ მეორე მხარის მიმართ არ განხორციელებულიყო ის, რის გამოც ჩვენ ვიდექით ამ აქციაზე. ეს არ ყოფილა კომპრომისი, არც უკან დახევა, ეს იყო ზრუნვა ჩვენს მეგობრებზე, იმისთვის რო ხეებისმგლეჯავ ადამიანებსა და ჩვენს შორის სისხლისღვრა არ მომხდარიყო", - დაწერა ნაჯა ორაშვილმა.

მისი თქმით, ბექა წიქარიშვილი პასუხისმგებლიანი ადამიანი და სწორედ ამიტომ დგას მის გვერდით.

"ვინც ბექას ლანძღავთ უბრალოდ უპასუხისმგებლო და სეირის მაყურებლები ხართ და ვერ იაზრებთ საზოგადოებაში არსებულ პრობლემის სიმწვავეს", - თქვა ნაჯა ორაშვილმა.

მან მადლობა გადაუხადა იმ პოლიციელებს, რომლებმაც გუშინ რუსთაველის გამზირზე უსაფრთხოება უზრუნველყვეს.

"დღეს მადლობას ვუხდიდით ზუსტად იმ პოლიციელებს ვინც წინა დღეს შავი პარასკევი მოგვიწყო. რაც შეეხება ჩვენს შემდგომ ნაბიჯებს ამას დღევანდელი შეხვედრა გვანახებს", - განაცხადა ნაჯა ორაშვილმა.

მან ფეისბუქზე ასევე იმ კითხვების ჩამონათვალი გამოაქვეყნა, რომელსაც დღეს ჩანიშნულ შეხვედრაზე შს მინისტრს დაუსვამს.

"არანაირად არ მართლდება გარე პერიმეტრზე ადამიანებზე ძალადობა, მათი დარბევა და ადმინისტრაციული წესით მათი დაჭერა.

არანაირად მართლდება, იმიტომ, რომ პირველი ვიყავი ვინც მომწამლავი ნივთიერების ბაზარზე არსებობის შესახებ შესაბამის უწყებებს შეატყობინა, პირველი ვიყავი, ვინც მზადყოფნა გამოთქვა რომ ერთად დავმდგარიყავით ამ ნივთიერების წინააღმდეგ ბრძოლაში", - დაწერა ნაჯა ორაშვილმა.

ნარკოპოლიტიკის ლიბერალიზაციის მოთხოვნით გამართული აქციის ორგანიზატორების ნაწილისთვის, აქციის დაშლის გადაწყვეტილება მიუღებელი აღმოჩნდა. თხმ-ს ერთ-ერთმა აქტივისტმა დავით სუბელიანმა, ფეისბუქზე სტატუსი გამოაქვეყნა, სადაც დაწერა, რომ თავს გაყიდულად გრძნობს.

პარასკევს, ბასიანსა და გალერიში ჩატარებული სპეცოპერაციის გასაპროტესტებლად პარლამენტთან დაწყებული აქცია 2 დღის განმავლობაში გაგრძელდა. აქციის მონაწილეები შს მინისტრისა და საქართველოს პრემიერის გადადგომას ითხოვდნენ. მათი მთავარი მოთხოვა მიმართული იყო ნარკოპოლიტიკის რეფორმისკენ და ძალადობის წინააღმდეგ. აქციის მონაწილეებმა ძალადობა ცეკვის და მუსიკით გააპროტესტეს.

აქციის მეორე დღეს, რამდენიმე ულტრანაციონალურმა ჯგუფმა რუსთაველის გამზირზე კონტრაქცია დაგეგმა. უსაფრთხოების მიზნით, გადაიკეთა საქართველოს პარლამენტისკენ მიმავალი ყველა გზა. ადგილზე მივიდა სპეციალური დანიშნულების რაზმები და წყლის ჭავლის მანქანა.

შს მინისტრმა აქციის მონაწილეებს მოუწოდა დახმარებოდენ პოლიციელებს საკუთარი მოვალეობის შესრულებაში. აქციის მონაწილეებს საპატრიარქოს წარმომადგენელმაც მიმართა და დაშლისკენ მოუწოდა.

გიორგი გახარია საქართველოს პარლამენტთან მივიდა და აქციის ორგანიზატორებთან შეხვედრა გამართა. მოლაპარაკებების დასრულების შემდეგ შს მინისტრმა აქციის მონაწილეებს მიმართა და ბოდიში მოიხადა, ასევე დადო პირობა, რომ აქციის მონაწილეების ყველა კითხვებს უპასუხებს.