გიორგი გახარიამ პარლამენტთან მიმდინარე აქციაზე აქციის მონაწილეებს ბოდიში მოუხადა. მან ბოდიში მოიხადა იმ სამართალდამცველების სახელითაც, რომლებმაც ბასიანის და გალერის სტუმრებს სიტყვიერი და ფიზიკური შეურაცხყოფა მიაყენეს და უფლებამოსილებას გადაამეტეს.

მან აქციის მონაწილეებსაც მოსთხოვა ბოდიშის მოხდა იმ სამართალდამცველების მიმართ, რომლებსაც აქციის მონაწილეებმა სიტყვიერი შეურაცხყოფა მიაყენეს.

"თქვენი არჩევანია, მოუხდით თუ არა პოლიციელებს ბოდიშს", - თქვა გიორგი გახარიამ.

შს მინისტრმა აქციის მონაწილეებს თხოვნით მიმართა, რომ დღეს აქციები დაასრულონ.

"უკვე მეორე დღეა, თქვენი გამოხატვის თავისუფლებას ხელი არ შეშლია. ასევე იცით, რომ დღეს აქ თითოეული პოლიციელი ზრუნავდა თქვენს უსაფრთხოებაზე", - თქვა გიორგი გახარიამ.

"იმისთვის, რომ ჩვენ მივაღწიოთ ერთ საერთო მიზანს, ვიპოვოთ გამოსავალი, იმ საკმაოდ რთული ამოცანებიდან, რომლებიც ჩვენს წინაშე ერთობლივად დგას, უნდა გადავინაცვლოთ სამუშაო რეჟიმში", - აცხადებს გიორგი გახარია.

შს მინისტრი აქციის მონაწილეებს დაპირდა, რომ ხვალ დილით ათ საათზე, შეხვდება აქციის ორგანიზატორებს, იქ სადაც თავად გადაწყვეტენ. მინისტრის თქმით, ის დეტალურად განიხილავს პარასკევის სპეცოპერაციის ყოველ წუთს.

"ყველა ის ადამიანები, რომლეზეც ერთობლივად შევთანხმდებით, რომელთა უფლებებიც დაირღვა, იქნება უფლება აღდგენილი. ასევე გპირდებით, რომ ჩვენ ნარკოპოლიტიკის მიმართულებით, კონკრეტულ შედეგებს მივაღწევთ. ასევე ვთანხმდებით იმაზე, რომ თუ ეს დაპირებები არ შესრულდება, ჩვენ ყოველთვის შეგვიძლია ამ თავისუფალ ქალაქში, თავისუფალი პარლამენტის წინ, ასევე შევიკრიბოთ, ან ვიცეკვოთ ან მოვუსმინოთ მუსიკას", - ამბობს გიორგი გახარია.

მან აქციის მონაწილეებს მოუწოდა, რომ დაემორჩილონ პოლიციის მითითებებს და გაუფრთხილდნენ მოქალაქეების უსაფრთხოებას.

მინისტრმა კონტრაქციის მონაწილეებსაც მიმართა და მოუწოდა ერთად შეინარჩუნონ გამოხატვის მიღწევები, რომელიც ქვეყანას აქვს და არ შევიდნენ კონფლიქტში, რომელიც მხოლოდ დროს დააკარგვინებს მათ.