თეთრი ხმაურის მოძრაობის ერთ-ერთი ლიდერი დავით სუბელიანი, პარლამენტთან აქციის დაშლის შემდეგ, ფეისბუქზე სტატუსს აქვეყნებს.

"ესეთი ბექა არ მახსოვს. დაიხია ხალხის, ჩვენი სახელით შესულმა ჯგუფმა უკან. გაყიდულად ვგრძნობ თავს", - დაწერა დავით სუბელიანმა.

პარასკევს, 12 მაისს, ბასიანსა და გალერიში ჩატარებული სპეცოპერაციის შემდეგ, პროტესტის ნიშნად გამართული აქცია დასრულდა. აქციის ორგანიზატორებმა შინაგან საქმეთა მინისტრთან შეთანხმებას მიაღწიეს.

თეთრი ხმაურის მოძრაობის წარმომადგენლების თქმით, ისინი აქციებს შაბათამდე წყვეტენ და თუ ხელისუფლებასთან შეთანხმებას ვერ მიაღწევენ აქციები ისევ განახლდება.

ხვალ, შს მინისტრი უპასუხებს პარასკევის სპეცოპერაციასთან დაკავშირებულ ყველა კითხვას. მან პირობა დადო, რომ დაისჯება ყველა სამართალდამცველი, ვინც უფლებამოსილებას გადაამეტა და ასევე დაჩქარდება ნარკოპოლიტიკის რეფორმის მიღება.