შს მინისტრმა, გიორგი გახარიამ პარლამენტის წინ აქციის მონაწილეებს მიმართა და განაცხადა, რომ 14 მაისს დილის 10 საათზე მათ წარმომადგენლებს შეხვდებოდა და ყველა საკითხს განიხილავდა მათთან ერთად.

გახარია დემონსტრანტებთან მას შემდეგ გამოვიდა, რაც მანამდე თეთრი ხმაურის მოძრაობის ლიდერმა მინისტრის დაპირებები გააჟღერა. იქ შეკრებილებს, მათ შორის, ორგანიზატორების ნაწილს მინისტრის მიერ შემოთავაზებული პირობები მიუღებელი აღმოჩნდა და ისინი გახარიასგან ბოდიშის მოხდას ითხოვდენენ.

გიორგი გახარიამ მათ ბოდიში მოუხადა.

შს მინისტრმა ტელე იმედის ეთერითა განაცხადა, რომ მზად არის პარლამენტთან მივიდეს, აქციის მონაწილეებს შეხვდეს და 12 მაისის სპეცოპერაციასთან დაკავშირებით ყველა კითხვას უპასუხოს.

პარლამენტთან აქცია "ჩვენი თავისუფლებისთვის" ორგანიზატორები 12 მაისის მოვლენების შემდეგ პრემიერ-მინისტრისგან კითხვებზე პასუხის გაცემას ითხოვენ.

პრემიერმა, გიორგი კვირიკაშვილმა 13 მაისს საგანგებო ბრიფინგზე სპეცოპერაციასთან დაკავშირებით განმარტება არ გააკეთა. მან საზოგადოებას გაერთიანებისკენ მოუწოდა.

12 მაისს გვიან ღამით კლუბ ბასიანსა და კაფე გალერიში სპეცოპერაცია ჩატარდა. შინაგან საქმეთა სამინისტროს განცხადებით, მათ რვა ნარკორეალიზატორი დააკავეს. სპეცოპერაციის პარალელურად დაპირისპირება იყო პოლიციასა და მოქალაქეებს შორის. ადმინისტრაციული წესით დააკავეს 50-მდე პირი, ისინი გუშინ დილითვე გაათავისუფლეს.

სპეცოპერაციაზე განცხადება გააკეთა თბილისის მერმა, კახა კალაძემ. მისი თქმით, სპეცოპერაცია ღამის ეკონიმიკას და კლუბურ მუსიკას ზიანს არ მიაყენებს.