თეთრი ხმაურის მოძრაობის ლიდერმა, ბექა წიქარიშვილმა, აქციის მსვლელობისას თბილისის მერიას ბიოტუალეტების დამონტაჟება სთხოვა. მისი განცხადებით, აქტივისტები დაშლას არ აპირებენ, რის გამოც საჭიროა სპეციალური პირობების შექმნა, რათა მიმდებარე ტერიტორია არ დანაგვიანდეს.

"მერიას ვთხოვ, რომ დაგვიმონტაჟოს ბიოტუალეტები და ნაგვის ურნები, რადგან ჩვენ დაშლას არ ვაპირებთ. აქ ვიქნებით ბოლომდე", - განაცხადა ბექა წიქარიშვილმა

თბილისის პარლამენტთან ამ წუთებში საპროტესტო აქცია მიმდინარეობს. აქციის ორგანიზატორები 12 მაისს თბილისის კლუბებში ჩატარებულ სპეცოპერაციებსა და ქვეყანაში არსებულ ნარკოპოლიტიკას აპროტესტებენ. მათი მოთხოვნებია:

  • დატოვოს თანამდებობა პრემიერ-მინისტრმა გიორგი კვირიკაშვილმა;
  • გადადგეს შს მინისტრი;
  • დაისაჯოს 12 მაისის "შავი პარასკევის" ოპერაციაზე პასუხისმგებელი ყველა პირი;
  • "მმართველ ძალაში ჯერ კიდევ ხალხის მხარეს მდგომი პოლიტიკოსები გაემიჯნონ ხელისუფლების მიერ არჩეულ მცდარ კურსს".