"ღამის ეკონომიკაზე რომ ვერ ვლაპარაკობთ, ფაქტია", - ასე გამოეხმაურა ღამის თბილისის ეკონომიკის ხელმძღვანელი, სერგი გვარჯალაძე თბილისის კლუბებში ჩატარებულ სპეცოპერაციებს. მისი თქმით, მსგავსი სიტუაცია არავისთვის არის მომგებიანი.

"ეს არის სფერო, სადაც ქვეყანამ ბოლო ხუთი წლის მანძილზე სახელი. აქ შეიძლება 90 პროცენტი და მეტი არ არის მომხრე ნარკოტიკების და არაჯანსაღი ცხოვრების, მაგრამ ასეთი მოპყრობა არ შეიძლება. ვფიქრობ, ეს არის წამგებიანი პოზიცია", - თქვა გვარჯალაძემ, როცა ის პარლამენტის შენობასთან მივიდა.

გვარჯალაძის თქმით, მან ინფორმაციის მისაღებად დარეკა ყველა შესაძლო პირთან, ვისთანაც შეეძლო, თუმცა არა თბილისის მერთან. ის ამბობს, რომ მერის ტელეფონის ნომერი არ აქვს.

ის ამბობს, რომ ესაუბრა სამართალდამცველებს და მასაც აქციის მონაწილეების მსგავსი კითხვები აქვს.

"ვერ ვხვდები რა ხდება, ვისთვის არის და რატომ ხდება. ეს ახალგაზრდა ადამიანები, რომლებიც საცეკვაოდ იყვნენ მისულები რატომ ჩავაყენეთ ასეთ მდგომარეობაში და რატომ ჩავაყენეთ პოლიცია ასეთ მდგომარეობაშიც", - განაცხადა სერგი გვარჯალაძემ.

წუხელ, გვიან ღამით თბილისის ორ კლუბში, გალერიასა და ბასიანზე ნიღბიანი სპეცრაზმელები შევიდნენ. როგორც თვითმხილველები ყვებიან მათ ადგილი დაატოვებინეს და დაიწყო ჩხრეკა.