ღამის თბილისის ეკონომიკის ხელმძღვანელის სერგი გვარჯალაძის განცხადებით, მისთვის გაუგებარია რა მოხდა და რა მიზანს ემსახურებოდა.

მისი თქმით, სპეცოპერაცია, რომელიც ბასიანსა და გალერიში ჩატარდა აბსოლუტურად მიუღებელია და ქვეყანას ცუდად წარმოაჩენს.

"არ ვიცი რა მიზეზი ჰქონდა პოლიციას, ასეთი სიტუაცია არავისთვისაა მომგებიანი და მთლიანად ქვეყნისთვის დამაზიანებელია, როცა ვიცით, რომ ეს არის სფერო, რომლითაც ქვეყანამ გაითქვა სახელი. მე ვფიქრობ, რომ ეს არის წამგებიანი პოზიცია", - განაცხადა სერგი გვარჯალაძემ.

მისი თქმით, ის ესაუბრა სამართალდამცველებს და მასაც აქციის მონაწილეების მსგავსი კითხვები აქვს.

"ვერ ვხვდები რა ხდება, ვისთვის არის და რატომ ხდება. ეს ახალგაზრდა ადამიანები, რომლებიც საცეკვაოდ იყვნენ მისულები რატომ ჩავაყენეთ ასეთ მდგომარეობაში და რატომ ჩავაყენეთ პოლიცია ასეთ მდგომარეობაშიც", - განაცხადა სერგი გვარჯალაძემ.

დაკავებები გაგრძელდა რუსთაველის გამზირზე. ამ ეტაპზე უცნობია, ზუსტად რამდენი ადამიანი დააკავეს სამართალდამცველებმა.

შეგახსენებთ, რომ შსს-მ რამდენიმე საათის წინ კლუბ „ბასიანსა“ და „გალერიში“ სპეცოპერაციები ჩაატარა.