შინაგან საქმეთა სამინისტრომ გამოძალვის ბრალდებით სპეცოპერაციის დროს დიდუბეში ორი პირი დააკავა. შემთხვევა 10 მაისს მოხდა.

უწყების განმარტებით, ბრალდებულებმა ერთ-ერთის კუთვნილ სასტუმროში მიიყვანეს ერთი პირი, რომელსაც სიტყვიერი და ფიზიკური შეურაცხყოფა მიაყენეს, ღირსების შემლახველი ფოტოები გადაუღეს. შსს-ს თქმით, დაკავებულები დაზარალებულს დიდი ოდენობით ფულად თანხას სძალავდნენ, წინააღმდეგ შემთხვევაში, ოჯახის წევრების მოკვლით და ფოტოების ინტერნეტსივრცეში გამოქვეყნებით დაემუქრნენ.

პოლიციამ სასტუმროს ერთ-ერთი ნომრიდან, რომელშიც ერთ-ერთი დაკავებული ცხოვრობდა, შვიდი საბრძოლო ვაზნით ნაგანის სისტემის პისტოლეტი და საინექციოდ გამზადებული ნარკოტიკული ნივთიერება ნივთმტკიცებად ამოიღო.

გამოძიება ჯგუფური გამოძალვის ფაქტზე მიმდინარეობს, სისხლის სამართლის კოდექსის 181-ე მუხლის მე-2 ნაწილის "ა" ქვეპუნქტით, რაც ისჯება თავისუფლების აღკვეთით ვადით ოთხიდან შვიდ წლამდე.