შინაგან საქმეთა სამინისტროს განცხადებით, სამართალდამცველებმა წარსულში ნასამართლევი ძმები პოლიციელზე ჯგუფურად თავდასხმის ბრალდებით, ლანჩხუთში დააკავეს.

გამოძიების ვერსიით, მიმდინარე წლის 10 მაისს ისინი ლანჩხუთში, ჟორდანიას ქუჩაზე, თავს დაესხნენ დეტექტივ-გამომძიებელს, სიტყვიერი და ფიზიკური შეურაცხყოფა მიაყენეს მას და შემთხვევის ადგილიდან მიმალვას ცდილობდნენ.

გამოძიების ინფორმაციით, დეტექტივ-გამომძიებელი ბრალდებულების მიერ ჩადენილ დანაშაულს იძიებდა. უწყების მტკიცებით, ძმებმა რამდენიმე თვის წინ ლანჩხუთში კლინიკა მედალფას ექიმი-ნევროპათოლოგი სცემეს.

გამოძიება საქართველოს სსკ-ს 353-ე პრიმა მუხლის მე-2 ნაწილით მიმდინარეობს, რაც პოლიციელზე მის სამსახურებრივ საქმიანობასთან დაკავშირებით ჯგუფურად თავდასხმას გულისხმობს. დანაშაული 7-დან 11 წლამდე ვადით თავისუფლების აღკვეთას ითვალისწინებს.