ძიუდოისტებმა, რომლებიც ფედერაციის პრეზიდენტის, დავით ქევხიშვილის გადადგომას ითხოვენ, ყრილობა დატოვეს. როგორც ძიუდოისტთა ნაკრების კაპიტანმა, ვარლამ ლიპარტელიანმა ჟურნალისტებს განუცხადა, მათ პრეზიდენტისგან კითხვებზე პასუხი ვერ მიიღეს.

"გვინდა, რომ ძიუდოში იყოს ნორმალური მდგომარეობა და არ იყოს ერთპიროვნული მმართველობა", - განუცხადა მან ჟურნალისტებს. ყრილობა დახურულ ფორმატში მიმდინარეობს.

ყრილობის დაწყებამდე დავით ქევხიშვილმა განაცხადა, რომ ამ ფორმატში ყველა პრობლემის განხილვა სურს.

"აქ არ არის საუბარი იმაზე, რომ მე ჩემს, როგორც დავით ქევხიშვილის პრეზიდენტის პოსტს ვიცავ, არამედ მე ვიცავ ძიუდოს ფედერაციის პრეზიდენტის სტატუსს, იქიდან გამომდინარე, რომ არ შეიძლება ერთი ხელის აღებით, როდესაც მოუნდება რამდენიმე სპორტსმენს, დაიძახოს და გადააყენოს ან გადმოაყენოს, ეს მომავალ თაობებსაც შეეხება", - განაცხადა ქევხიშვილმა.

ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.