10, 11 და 12 მაისს ილიაუნის თეატრში ახალი სპექტაკლის პრემიერა შედგება. სპექტაკლი “მარატ-სადი”, პეტერ ვაისის პიესის მიხედვით, თეატრის ფოიეში გათამაშდება.

სპექტაკლი ახალგაზრდა რეჟისორის, საბა ასლამაზიშვილის დებიუტია. მან ილიას სახელმწიფო უნივერსიტეტის თეატრალური ხელოვნების პროგრამა, დრამის რეჟისურის მიმართულებით დაამთავრა. პიესაზე მან ამავე პროგრამის სტუდენტებთან და კურსდამთავრებულებთან ერთად იმუშავა, რომელთაც პარტნიორობას გამოცდილი, ცნობილი მსახიობები: ბაჩო ჩაჩიბაია, ამირან ქაჩიაბაია და ანი იმნაძე უწევენ.

ახალგაზრდა რეჟისორის სადებიუტო ნამუშევარი ქალაქ თბილისის მერიის ფინანსური ხელშეწყობით დაიდგა.

“ჟან-პოლ მარატის დევნა და მკვლელობა, შარანტონის თავშესაფრის მსახიობთა მიერ დადგმული მარკიზ დე სადის ხელმძღვანელობით” - ასე ჰქვია პიესას, რომელსაც მოკლედ “მარატ-სადს” უწოდებენ. მოქმედება საგიჟეთში ხდება, სადაც მარკიზ დე სადი სპექტაკლს პაციენტების მონაწილეობით დადგამს.

ფოტო: ილიას სახელმწიფო უნივერსიტეტი

შესაძლებელია კი სრული თანასწორობის მიღწევა რევოლუციის საშუალებით? არის რევოლუცია გზა, რომელიც მოგვანიჭებს ბედნიერებას, გაგვხდის თანასწორებს და დაგვიკმაყოფილებს სურვილებს? სწორედ ამ კითხვებზე ეძებს პასუხს მარკიზ დე სადი საკუთარი ექსპერიმენტული სპექტაკლის მეშვეობით და შედეგი, რომელსაც ის მიიღებს, საკმაოდ მოულოდნელია.

ახალგაზრდა დამწყები რეჟისორიც ზემოთხსენებული პასუხების ძიებაშია. მანაც ექსპერიმენტის გზა აირჩია - სპექტაკლი არა თეატრალურ დარბაზში, არამედ ფოიეში თამაშდება.

10 მაისს, პრემიერის შემდეგ თეატრში გაიმართება პიესის სრული თარგმანის პრეზენტაცია. წიგნი, რომელიც ჯემალ ჭელიძემ თარგმნა, ილიას სახელმწიფო უნიევრსიტეტის გამომცემლობაში დაიბეჭდა.