მსოფლიო რბენის საორგანიზაციო ჯგუფის ინფორმაციით, დანაგვიანებული ტერიტორიის გაწმენდითი სამუშაოები უკვე დაწყებულია და ხვალ დღის ბოლომდე დასრულდება.

საქართველოში მსოფლიო რბენის ორგანიზატორმა მაია აზარაშვილმა On.ge-ს უთხრა, რომ დღის განმავლობაში, ლოკაციაზე და სარბენ გზაზე გადანაწილებული იყო ურნები, თუმცა ნაგვის გატანა, გზის გადაკეტვის გამო არ ხერხდებოდა.

"ასევე, გვესმის, რომ ძალიან რთული ჭიქით ან ბოთლით სირბილი. წინასწარ გაწერილი გეგმის მიხედვით, მუნიციპალურ სამსახურთან ერთად, ორგანიზატორებმა ტერიტორიის დასუფთავება უკვე დაიწყეს და ხვალ დღის ბოლომდე დასრულდება", - განმარტავს მაია აზარაშვილი.

მსოფლიო რბენის მარათონის მიმდინარეობისას ფეისბუქში ვიდეო გავრცელდა, სადაც მსოფლიო რბენის მონაწილეების მიერ ბოთლებით, ერთჯერადი ჭიქებითა და საჭმლის ნარჩენებით დაბინძურებული გარემო ჩანს.

ექვს მაისს კახეთში მსოფლიო რბენა გაიმართა, რომელში მონაწილეობის მისაღებად 7 000 მონაწილე დარეგისტრირდა.