მსოფლიო რბენას საქართველო 2018 წელს მეხუთედ შეუერთდა. კახეთში, ლოპოტას გადასახვევიდან კავკასიონის ქედის გასწვრივ სარბენად 7 000 მონაწილე დარეგისტრირდა. ამის შესახებ საქართველოს კულტურისა და სპორტის სამინისტროს განცხადებაშია ნათქვამი.

Wings for Life World Run 2018 ეძღვნება 100 წლის იუბილეს საქართველოს პირველი დემოკრატიული რესპუბლიკის დაარსებიდან.

მსოფლიო რბენაში მონაწილეობას იღებს კულტურისა და სპორტის მინისტრი მიხეილ გიორგაძე.

მსოფლიო რბენას შეუერთდა საქართველოს გამარჯვებული - გიორგი შეკრელიძე, გერმანიის გამარჯვებული - სებასტიან ჰალმანი , თურქეთის გამარჯვებული -ვეისი ასლანი, პოლონეთის გამარჯვებული-იოაშა ზაკრჟევსკი, 2016 წლის კახეთის გამარჯვებული-იანა ხმელევა, 2014-2015 წლის კახეთის გამარჯვებული ანატოლი ოლეინიკოვი.

"ამ დღეს ერთად დარბიან: პროფესიონალი სპორტსმენები, მოყვარულები და ეტლით მოსარგებლე ადამიანები, მთავარია მსურველი 18 წლის იყოს. მსოფლიო რბენას სხვა შეზღუდვა არ აქვს. გასულ წელს ყველაზე ხანდაზმული მორბენალი 94 წლის შოთა სამუშია გახლდათ", - ნათქვამია განცხადებაში.

Wings for Life World Run-ში არ არის განსაზღვრული სარბენი მანძილი და დრო, არ არსებობს ტრადიციული ფინიშის ხაზი. არის მხოლოდ "ფინიშ მანქანა", რომელიც სტარტიდან 30 წუთის შემდეგ დაიძვრება, 15 კმ/ს სიჩქარით დაიწყებს მოძრაობას და მაქსიმალურ სიჩქარეს-35 კმ/ს განავითარებს. თუკი "ფინიშ მანქანა" მორბენალს გადაუსწრებს, ის შეჯიბრს გამოეთიშება. მორბენლებს უკან, სტარტზე, სპეციალური ავტობუსებით დააბრუნებენ. წელს "ფინიშის მანქანის" საჭესთან ავტომრბოლელი დათა ქაჯაიაა.

რბენის შედეგები ავსტრიის ქალაქ ზალცბურგიდან კონტროლდება. ყოველ მეხუთე კილომეტრზე მორბენლებს გამაგრილებელი სასმელი და ხილი ხვდებათ.

მსოფლიო რბენის 2 გამარჯვებული - ერთი ქალი და ერთი მამაკაცი, 2019 წელს თავად აირჩევენ მსოფლიოს რომელ ქვეყანაში ირბენენ. გლობალური ჩემპიონები კი, საჩუქრად
მიიღებენ რბენაში მოსამზადებელ სპეციალურ 4 კვირიან კურსს.