ქართული ოცნების დეპუტატი, გია ჟორჟოლიანი ამბობს, რომ ნეონაცისტური დაჯგუფების, ქართული მარშის წევრების თავდებობაზე გადაწყვეტილება მშობლების თხოვნით მიიღო. როგორც მან On.ge-სთან საუბარში თქვა დაკავებულთა ოჯახის წევრებმა დაარწმუნეს ის, რომ ბრალდებულები არსად გაიქცეოდნენ.

"მე არავითარი პოზიცია არ მაქვს. რა გადაწყვეტილებასაც მიიღებს სასამართლო ის იქნება. გადაწყვეტილება მივიღე არა პოლიტიკური პოზიციის გამო, არამედ იმის გამო, რომ არ მიიმალებიან, ჩემი აზრით", - განუცხადა ჟორჟოლიანმა On.ge-ს.

დეპუტატის თქმით, მშობლებისგან გარანტია მიიღო იმაზეც, რომ დაკავებულები წინასწარი პატიმრობიდან გათავისუფლების შემთხვევაში კანონს არ დაარღვევენ და ის ოჯახის წევრების თხოვნას ითვალისწინებს.

ქართული მარშის წევრების წინასწარი პატიმრობიდან გათავისუფლების მოთხოვნით, სასამართლოს შუამდგომლობით ქართული ოცნების კიდევ ერთმა დეპუტატმა, დავით ჭიჭინაძემ მიმართა. მარშის ლიდერის, სანდრო ბრეგაძის თქმით, შუამდგომლობას ხელს აწერს პატრიოტთა ალიანსის დეპუტატები ადა მარშანია, ემზარ კვიციანი და თიანეთის მერი, თამაზ მეჭიაური.

ქართული მარშის წევრების დაკავება

19 მარტს რუსთავი 2-ის ოფისის ეზოში შენობასთან შეკრებილმა ნეონაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

პატიმრობა შეეფარდათ სისხლის სამართლის საქმეზე დაკავებულ გიორგი ონიანს, ლუკა ნაცვლიშვილს, მიხეილ ამისულაშვილს, ლადო სადღობელაშვილს, ირაკლი დოლენჯაშვილს და ბექა რევაზიშვილს. ყველა მათგანს ბრალად ედებათ ხულიგნობა.

ამასთან გიორგი ონიანს ასევე ბრალად ედება ძალადობა (ცემა), რამაც დაზარალებულის ფიზიკური ტკივილი გამოიწვია, მაგრამ არ მოჰყოლია სსსკ-ის 120-ე (ჯანმრთელობის განზრახ მსუბუქი დაზიანება) მუხლით გათვალისწინებული შედეგი. ასევე ლუკა ნაცვლიშვილს გამოძიება სხვისი ნივთის განზრახ დაზიანებას ედავება, რამაც მნიშვნელოვანი ზიანი გამოიწვია.