ქართული ოცნების რვა დეპუტატის საკანონმდებლო ინიციატივით, შესაძლოა, საქართველოს სასაზღვრო გამშვებ პუნქტთან, საქართველოს მოქალაქეს უარი უთხრან გამგზავრებაზე. შემთხვევა განიხილება იმ დროს, თუკი მოქალაქე მიემგზავრება ევროკავშირის წევრი ქვეყნის მიმართულებით, იქ სადაც უვიზო რეჟიმი მოქმედებს.

ქართველმა მესაზღვრემ მოქალაქეს შეიძლება გამგზავრებაზე უარი უთხრას იმ შემთხვევაში, თუ:

1. არ აქვს ბიომეტრიული პასპორტი, რომელიც გაცემულია 10 წლის განმავლობაში და რომლის მოქმედების ვადაც საქართველოში დაბრუნების დღისთვის არანაკლებ 3 თვეა.
2. უკან დასაბრუნებელი სამგზავრო ბილეთი;
3. სასტუმროს/საცხოვრებლის მოქმედი ჯავშანი ან სხვა დამადასტურებელი დოკუმენტი ან ევროკავშირის ტერიტორიაზე მცხოვრები მასპინძლის მისამართი;
4. სამოგზაურო დაზღვევა;
5. მოგზაურობის ფინანსური უზრუნველყოფის დამადასტურებელი დოკუმენტი.

ცვლილების ინიციატორები არიან დეპუტატები: არჩილ თალაკვაძე, ეკა ბესელია, მამუკა მდინარაძე, გიორგი ვოლსკი, ოთარ დანელია, კახა კუკავა, გიორგი ხატიძე და ზვიად კვაჭანტირაძე. ინიციატივა პარლამენტში ჯერ არ არის დარეგისტრირებული.

ცვლილება დაგეგმილია საქართველოს მოქალაქეების საქართველოდან გასვლისა და შესვლის წესების შესახებ საქართველოს კანონში.

განმარტებით ბარათში ნათქვამია, რომ პროექტის მიზანია არსებული რესურსების ფარგლებში გაძლიერდეს პრევენციული მექანიზმი, რათა შემცირდეს საქართველოს იმ მოქალაქეთა გადინება, რომლებიც არაკეთილსინდისიერად გამოიყენებენ უვიზოდ მოგზაურობის შესაძლებლობას.

ცვლილების ერთ-ერთი ინიციატორის, გია ვოლსკის თქმით, პრაქტიკამ აჩვენა, რომ ზოგიერთმა მოქალაქემ ვერ გაიგო, თუ რა დოკუმენტაციაა საჭირო შენგენის ზონაში შესასვლელად.

დეპუტატი დავით მათიკაშვილი განმარტავს, რომ იმ დოკუმენტების ნუსხა დგინდება, რაც მოქალაქეებს უნდა გააჩნდეთ მაშინ, როცა სამოგზაუროდ მიდიან ევროკავშირის მიმართულებით:

"ეს კარგი საშუალებაა, რომ საქართველოს საზღვართან მოხდეს მნიშვნელოვანი პრობლემის პრევენცია".

ერთიანი ნაციონალური მოძრაობის ლიდერი, რომან გოცირიძე ამბობს, რომ ამ ინიციატივას შეიძლება კარგი მიზანი აქვს, თუმცა ვერავინ განსაზღვრავს, ადამიანი როდესაც მიემგზავრება, ის დარჩება სამ თვეზე მეტი ხნით, თუ არა:

"ბარიერების აღმართვა, დამატებითი დოკუმენტების შემოწმება და სასაზღვრო ფილტრის გავლება - ეს არის დაუშვებელი. შეიძლება ეს გამოიყენონ, როგორც კორუფციული, ასევე პოლიტიკური დევნის კუთხით. რომელიღაც მესაზღვრე თუ ჩინოვნიკი ხდება ადამიანის გადაადგილების განმსაზღვრელი".

ევროპული საქართველოს წევრი დავით ბაქრაძე ასევე აკრიტიკებს პროექტს და ამბობს, რომ მიუღებელია ასეთი ცვლილება.