ტელეიმედის საქმეზე სპეციალური ოპერატიული დეპარტამენტის ყოფილი ხელმძღვანელი, ერეკლე კოდუა სამსახურეობრივი უფლებამოსილების გადამეტების ბრალდებით, პასუხისგებაში მისცეს. ამის შესახებ ინფორმაცია პროკურატურამ რამდენიმე წუთის წინ გაავრცელა.

პროკურატურის ინფორმაციით, ჩატარებული გამოძიებით დადგინდა, რომ 2007 წლის 7 ნოემბერს, ტელეკომპანია იმედის მაუწყებლობის გასათიშად ტელევიზიაში სოდ-ის სპეცდანიშნულების რაზმი შსს-ს სხვა ქვედანაყოფებთან ერთად შეიჭრა. უწყებაში განაცხადეს, რომ ამ მოვლენებს სოდ-ის დეპარტამენტის დირექტორი ხელმძღვანელობდა.

"მიუხედავად იმისა, რომ ძალოვანი უწყების წარმომადგენლებს არ ჰქონდათ სამართლებრივი საფუძველი, ისინი ძალისმიერი მეთოდით, უკანონოდ შეიჭრნენ ტელევიზიის შენობაში, მიზანმიმართულად დააზიანეს ძვირადღირებული საეთერო ჩართვის აპარატურა და ტელევიზიის ინვენტარი. ამასთან სპეცდანიშნულების რაზმის წევრებმა ჟურნალისტებს და ტელეკომპანიაში დასაქმებულ პერსონალს, ცეცხლსასროლი იარაღის გამოყენებით მიაყენეს ფიზიკური შეურაცხყოფა, გამოაძევეს შენობიდან და შენობის გარეთ დაუშინეს რეზინის ტყვიები", - განაცხადეს პროკურატურაში.

მათივე ინფორმაციით, ამ დრო 13 პირი დაშავდა და ტექნიკისა და ინვენტარის ზიანმა 3 158 307 ლარი შეადგინა.

საქმეზე გამოძიება სისხლის სამართლის კოდექსის 333-ე მუხლის მესამე ნაწილით მიმდინარეობს. ამ მუხლით, ძალადობით ან იარაღის გამოყენებით, სამსახურებრივი უფლებამოსილების გადამეტება სახელმწიფო-პოლიტიკური თანამდებობის მქონე პირის მიერ ისჯება თავისუფლების აღკვეთით ვადით ხუთიდან რვა წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

პროკურატურის ინფორმაციით, ამ საქმეზე ბრალდებული უკვე მსჯავრდებულია ვალერი გელაშვილზე განხორციელებული თავდასხმისა და ე.წ. ავტომანქანების საქმეებზე. მას ჯამში 9-წლიანი პატიმრობა აქვს მისჯილი.

ერეკლე კოდუას ფეისბუქის გვერდზე გამოეხმაურა ბრალდებას და განაცხადა, რომ ის კიდევ ერთხელ გახდა პოლიტიკური დევნის ობიექტი:

"დღევანდელი მორიგი აბსურდული ფალსიფიცირებული საქმე ჩემთვის მოულოდნელი ნამდვილად არ ყოფილა. გასაკვირი მხოლოდ ისაა, რატომ დასჭირდა მათი ფანტაზიის დამწიფებას 6 წელი. მე ძალიან ვამაყობ, რომ შესაძლებლობა მომეცა მემსახურა ჩემს ქვეყანას და ჩემი წვლილი შემეტანა კრიმინალთან ბრძოლაში და მოსახლეობის უსაფრთხოების უზრუნვეყოფაში. მე ძალიან ამაყი ვარ, რომ 2007 წელს ჩემი წვლილი შევიტანე იმაში, რომ ქვეყანა ხელში არ ჩავარდნოდა ერთ რუს ოლიგარქს, რომელიც მკველობასაც არ ერიდებიდა საკუთარი მიზნების შესასრულებლად. დღეს მეორე რუსმა ოლიგარქმა გადაწყვიტა შური იძიოს ჩემზე სწორედ ამის გამო".