თეთრი ხმაურის მოძრაობის ინფორმაციით, დაფიქსირდა მოქალაქეების მძიმე ინტოქსიკაციის შემთხვევები, რომლებიც შესაძლოა გამოწვეული იყოს ახალი ფსიქოაქტიური ნივთიერება - მეფედრონით. ორგანიზაციის განცხადებით, ნივთიერების არასწორმა მოხმარებამ ან ზედოზირებამ, შესაძლოა, ფატალური შედეგი გამოიწვიოს. ამ ნარკოტიკული საშუალების მოხმარებასთან დაკავშირებულ რისკებზე თეთრი ხმაური რეკომენდაციებს ავრცელებს.

"მეფედრონი, იგივე 4-methyl methcathinone (4-MMC) ან 4-methylephedrone, სინთეტიკური სტიმულატორია ამფეტამინის და კათინონის ჯგუფიდან. მას იცნობენ, როგორც აბაზანის მარილს. სხვა სახელები: Meph, meow, miaow-miaow, m-cat, plant food, drone, bubbles, kitty cat."

თეთრი ხმაურის ინფორმაციით, მიუხედავად მინიმალური დოზების დაცვისა, მეფედრონის სხვა ნივთიერებასთან ერთად მოხმარება შესაძლოა სიცოცხლისთვის საფრთხის მომტანი აღმოჩნდეს. საშიში კომბინაციებია: მეფედრონი +

  • NBOMe: გონების დაკარგვა, კრუნჩხვები, გაზრდილი არტერიული წნევა, სისხლძარღვების შევიწროება, გულისცემის აჩქარება, უკიდურეს შემთხვევაში გულის უკმარისობა;
  • ალკოჰოლი: ინტოქსიკაციის მაღალი რისკის გამო ერთ-ერთი ყველაზე საშიში კომბინაციაა. ამაღლებს სიკვდილიანობის რისკს;
  • DXM: ამ კომბინაციას შეუძლია გამოიწვიოს გულის აჩქარება და პანიკური შეტევა;
  • MXE: გულისცემის აჩქარება და მაღალი სისხლის წნევა;
  • ტრამადოლი: იწვევს კრუნჩხვებს;
  • MDMA: მაღალი რისკის შემცველი კომბინაციაა, იწვევს სიკვდილიანობის რისკს;
  • კოკაინი: იწვევს გულის შეტევას.

მეფედრონის მოხმარებასთან დაკავშირებული რისკები

  • მეფედრონით თრობის დროს დამახასიათებელი სიმპტომებია: ეიფორია, ენერგიის მატება, აღგზნება, გადამეტებული აქტიურობა, პულსისა და სუნთქვის გახშირება, ცხვირიდან სისხლდენა, არტერიული წნევის მატება, შფოთვა, პარანოია, ღიაობა, ლაპარაკის სურვილი, მოუსვენრობა, გამონაყარი, კონკრეტული ნარკოტიკული ნივთიერების შიმშილი;
  • ძლიერი ზედოზირების დროს შემდეგი სიმპტომები ვლინდება: კიდურების ბლოკირება, კრუნჩხვები, გულმკერდის ტკივილი, გულის პალპატი, გაუწყლოება, ტინიტუსი, ვასკულიტი ანუ სისხლძარღვების ანთება, სუნთქვის შეჩერება.

თეთრი ხმაურის რეკომენდაციები

  • პირველ რიგში, ნარკოტიკული საშუალების მიღებამდე გაარკვიეთ თუ რა ნივთიერებას მოიხმართ;
  • არ მიიღოთ მეფედრონი გულ-სისხლძარღვთა დაავადებების მქონე ადამიანებმა;
  • არ მოიხმაროთ ალკოჰოლთან, ენერგეტიკულ სასმელთან ან სხვა ნარკოტიკულ საშუალებასთან ერთად კომბინაციაში, შესაძლოა ფატალური შედეგით დასრულდეს;
  • დეჰიდრატაციის ასაცილებლად მიიღეთ ჭარბი რაოდენობის წყალი ან ნატურალური წვენი;
  • ნივთიერების მოხმარების დროს არ დარჩეთ მარტო;
  • დაბალი ზედოზირების დროს, მშვიდ და გრილ გარემოში მოთავსდით, წამოწექით და ნელა ისუნთქეთ. ეს თუ ვერ შეგიმსუბუქებთ მდგომარეობას, დაუყოვნებლივ მიმართეთ სამედიცინო დახმარებას.

თეთრი ხმაურის ინფორმაციით, აღნიშნული ნივთიერება ინტერნეტში, სხვადასხვა ვებგვერდების საშუალებით არის ხელმისაწვდომი.