საქართველოს მთავარი პროკურატურა აცხადებს, რომ ცენტრ პოინტის საქმეზე ბრალდებულმა სალომე ჩარკვიანმა გამოძიებას "ობიექტური ჩვენება მისცა", გარდა ამისა, არსებობს სხვა გარემოებები, რის საფუძველზეც სამართალდამცავი უწყება მისთვის საპროცესო შეთანხმების გაფორმებას და პირობითი სასჯელის დაკისრებას ითხოვს.

პროკურატურამ განცხადება დღეს გაავრცელა:

"საზოგადოებისთვის ცნობილია, რომ 2016 წლის 10 ივლისს, შპს ცენტრ პოინტ ჯგუფის ფილიალის, ცენტრ პოინტ აჭარას ყოფილი დირექტორი სალომე ჩარკვიანი სასამართლოს მიერ გაცემული განჩინების საფუძველზე, პროკურატურის თანამშრომლების მიერ დაკავებულ იქნა წინასწარი შეთანხმებით ჯგუფის მიერ, დიდი ოდენობით თანხების გაფლანგვის ფაქტზე. დანაშაული გათვალისწინებული საქართველოს სისხლის სამართლის კოდექსის 182-ე მუხლის მეორე ნაწილის „ა“ და მესამე ნაწილის „ბ“ ქვეპუნქტებით.

სალომე ჩარკვიანს აღკვეთის ღონისძიების სახით პატიმრობა 2016 წლის 12 ივლისს შეეფარდა. 15 ივლისს, მასთან საპროცესო შეთანხმების გაფორმების თხოვნით სალომე ჩარკვიანმა განცხადებით მომართა ქ. თბილისის პროკურატურას.

განცხადების განხილვისას ბრალდების მხარემ გაითვალისწინა რიგი გარემოებები. კერძოდ: სალომე ჩარკვიანმა სრულად ითანამშრომლა გამოძიებასთან, მისცა საქმის რეალური გარემოებების ამსახველი ობიექტური ჩვენება. იგი წარსულში არ არის ნასამართლევი. საქმეში მისი როლი და ქმედების ხასიათი შედარებით ნაკლები საზოგადოებრივი საშიშროების მატარებელია. პროკურატურის მიერ ასევე გათვალისწინებული იქნა ის გარემოება, რომ დაზარალებულებმა მათთან გავლილი წერილობითი კონსულტაციების დროს დააფიქსირეს თანხმობა სალომე ჩარკვიანისთვის საპროცესო შეთანხმების გაფორმებასთან დაკავშირებით და ყოველივე ზემოაღნიშნულის მხედველობაში მიღებით, მიღებულ იქნა გადაწყვეტილება სალომე ჩარკვიანთან საპროცესო შეთანხმების გაფორმების თაობაზე, რა დროსაც მას სასჯელის სახით განესაზღვრება პირობითი მსჯავრი. ზემოხსენებული შუამდგომლობით ბრალდების მხარემ უკვე მიმართა თბილისის საქალაქო სასამართლოს".

საქართველოს მთავარმა პროკურატურამ ცენტრ პოინტის დამფუძნებლის, მაია რჩეულიშვილის, გუკა რჩეულიშვილის, ასევე ცენტრ-პოინტის ბათუმის საინვესტიციო პროექტის ხელმძღვანელს ირაკლი მინდელსა და გაყიდვების მენეჯერ სალომე ჩარკვიანს ბრალი რამდენიმე დღის წინ წაუყენა. ამჟამად ოთხივე ბრალდებული დაკავებულია.

სასამართლო ცენტრ პონტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება. ამჟამად ოთხივე ბრალდებული დაკავებულია.