შინაგან საქმეთა სამინისტროს ინფორმაციით, თბილისში, ბარნოვის ქუჩაზე, მოპედის მოპარვის დროს სამი პირი დააკავეს. დაკავებულებს ბრალი ედებათ სატრანსპორტო საშუალებების და მათი ნაწილების არაერთგზის ქურდობაში.

უწყების განცხადებით, პოლიციამ, ერთ-ერთი დაკავებულის საცხოვრებელი სახლის ჩხრეკისას ნივთმტკიცებად 3 მოპედი, ავტომობილის საბურავები და უკანონოდ გასხვისებული აკუმულატორები ამოიღო.

უწყებაში ამბობენ, რომ ერთი ბრალდებული წარსულში ანალოგიური დანაშაულისთვის ნასამართლევია და ამჟამად პირობითი მსჯავრის ქვეშ იმყოფება. სამივე დაკავებული დანაშაულს აღიარებს.

გამოძიება საქართველოს სისხლის სამართლის კოდექსის 177-ე მუხლის მე-3 ნაწილის "ა" ქვეპუნქტით მიმდინარეობს, რაც წინასწარი შეთანხმებით ჯგუფის მიერ ჩადენილ ქურდობას გულისხმობს. აღნიშნული დანაშაული 4-დან 7 წლამდე თავისუფლების აღკვეთას ითვალისწინებს.