ტელეკომპანია რუსთავი 2-ის იურისტის, თამთა მურადაშვილის თქმით, იუსტიციის სამინისტრომ ევროსასამართლოსგან ტელეკომპანიის წილების გასხვისებაზე შეზღუდვის მოხსნა ითხოვა. ამის შესახებ მურადაშვილმა On.ge-ს სტრასბურგის სასამართლოდან მიღებული დოკუმენტის გაცნობის შემდეგ განუცხადა.

"იმ არგუმენტით ითხოვენ, რომ ეს დროებითი ღონისძიება ლახავს საქართველოს სასამართლოს იმიჯს, რომ ეს იყო უპრეცედენტო შემთხვევა და მანამდე არ იყო გამოყენებული. მიაჩნიათ, რომ ეს ღონისძიება ლახავს კომპანიის კანონიერი მესაკუთრის, ქიბარ ხალვაშის საკუთრების უფლებას", - ამბობს მურადაშვილი.

მისი თქმით, საქართველოს ხელისუფლება ამტკიცებს, რომ არხზე დადებული ყადაღა არ აფერხებს მუშაობის პროცესსა და წილებთან დაკავშირებით სასამართლომ დამოუკიდებელი და მიუკერძოებელი გადაწყვეტილება მიიღო. გარდა ამისა, როგორც არხის იურისტი აღნიშნავს, საქართველომ ევროსასამართლოს აცნობა, რომ არხის წილებთან დაკავშირებით პოლიტიკურად მოტივირებული დავა არ არსებობდა და პირიქით, რუსთავი 2 ესხმოდა სასამართლოს თავს.

მურადაშვილი ამბობს, რომ არხის მიკერძოებულობის მაგალითებად საქართველოს ხელისუფლებამ ევროპული საქართველოსა და არხის ყოფილი ჟურნალისტის, აკაკი გოგიჩაიშვილის განცხადებები მოიყვანეს. ევროპულმა საქართველომ რუსთავი 2 არასწორი ინფორმაციის გაშუქებაში დაადანაშაულა, აკაკი გოგიჩაიშვილმა კი - სიუჟეტების დაბლოკვაში.

ამ საკითხზე On.ge საქართველოს იუსტიციის სამინისტროსაც დაუკავშირდა. უწყების პრესსამსახურში აღნიშნეს, რომ ამ საკითხზე არავის სურს საუბარი.

რუსთავი 2-ის საქმე

2017 წლის 3 მარტს სტრასბურგის ადამიანის უფლებათა ევროპულმა სასამართლომ რუსთავი 2-ის საქმეზე უზენაესი სასამართლოს მეირ გამოტანილი გადაწყვეტილების აღსრულება შეაჩერა. წინა დღეს, 2 მარტს საქართველოს უზენაესი სასამართლოს დიდმა პალატამ რუსთავი 2-ის 100 პროცენტი ქიბარ ხალვაშს მიაკუთვნა.

დეკემბერში სასამართლომ რუსთავი 2-ისა და მისი მფლობელების საქმის დასაშვებობაზე მსჯელობა დაიწყო. სტრასბურგის სასამართლო თითოეულ მომჩივანთან დაკავშირებით საქართველოს მთავრობას კითხვებს უსვამდა.

იუსტიციის სამინისტროს ცნობით, საქმეზე საკუთარი პოზიცია საქართველოს მთავრობამ სტრასბურგის სასამართლოს 28 მარტს წარუდგინა.

რუსთავი 2-ის საქმის შესახებ მეტი გაიგეთ აქ.