თბილისის საქალაქო სასამართლომ მამიდაშვილის მკვლელობისა და გაუპატიურებისთვის 23 წლის რობერტ ახალაიას 18-წლიანი პატიმრობა მიუსაჯა. ამის შესახებ ინფორმაციას სასამართლო ავრცელებს.

ბრალდებულს ბრალად ედებოდა გაუპატიურების მცდელობა (სსკ-ის 19,137-ე მუხლი) და დამამძიმებელ გარემოებებში, სხვა დანაშაულის დაფარვის მიზნით, განსაკუთრებული სისასტიკით ჩადენილი განზრახი მკვლელობა (სსკ-ის 109-ე მუხლის 1-ლი ნაწილის "დ" ქვეპუნქტი და მე-3 ნაწილის "ბ" ქვეპუნქტი).

სასამართლოს ინფორმაციით, ამ დღეს მსჯავრდებული მამიდაშვილთან სქესობრივი კავშირის დამყარებას ცდილობდა. შემთხვევა 2017 წლის 16 ივლისს, თბილისში, უზნაძის ქუჩაზე მოხდა.

"შემთხვევის დაფარვის მიზნით, ბრალდებულმა, დანის გამოყენებით, მრავლობითი - 35 ნაკვეთ-ნაჩხვლეტი ჭრილობა მიაყენა ა.ხ.-ს [ანა ხელაძეს], რომელიც კისრის არეში მიღებული მრავლობითი დაზიანებებით, საძილე არტერიისა და ვენის სრული გადაკვეთის შედეგად გამოწვეული მწვავე სისხლნაკლებობით, ადგილზე გარდაიცვალა", - აღნიშნულია სასამართლოს განცხადებაში.

ამავე განცხადების მიხედვით, დახურულ სასამართლო სხდომაზე ბრალდებულმა, აღიარა მამიდაშვილის მკვლელობა, თუმცა დამამძიმებელ გარემოებებში განზრახ მკვლელობასა და გაუპატიურების მცდელობაში, თავი დამნაშავედ არ ცნო.