იუსტიციის უმაღლეს საბჭოში, არამოსამართლე წევრებისთვის, არაეთიკური გამონათქვამებისა და დისციპლინური გადაცდომისათვის სასჯელის დანიშვნის საკითხის განხილვას კამათი მოჰყვა. იდეა საბჭოს მოსამართლე წევრ დიმიტრი გვრიტიშვილს ეკუთვნის.

"თუ საჯარო გამოსვლებისას საბჭოს მოსამართლე წევრს მოეთხოვება მაღალი ეთიკური სტანდარტის დაცვა, იგივე ვალდებულება უნდა გავრცელდეს, ჩვენი მოსაზრებით, საბჭოს არამოსამართლე წევრებზე",- აცხადებს გვრიტიშვილი. მისი თქმით, ეს პრაქტიკა უცხოეთში კარგად მუშაობს.

გვრიტიშვილის აზრს არამოსამართლე წევრები მათი გაჩუმების მცდელობად აფასებენ.

"ეს არის ძალიან საშიში ტენდენცია. იმედი მაქვს, რომ ასეთი ცვლილება კანონმდებლობაში არ განხორციელდება, ვინაიდან ეს არის არჩეული თანამდებობა. მაქსიმუმი, რაც შეიძლება გაკეთდეს არის ის, რომ საბჭოს წევრები შეთანხმდნენ გარკვეული ეთიკის წესებზე, რომლის მომხრეც პირადად მე გახლავართ, თუკი კონსესუსის საფუძველზე მოხდება", - აცხადებს არამოსამართლე წევრი ნაზი ჯანეზაშვილი.

იუსტიციის უმაღლესი საბჭო მოსამართლეებისათვის დისციპლინური სამართალწარმოების კანონპროექტს დახურულ სხდომებზე განიხილავს.