ცენტრ პოინტის ერთ-ერთმა დამფუძნებელმა, ვახტანგ რჩეულიშვილმა თავისი შვილის, გუკა რჩეულიშვილისთვის აღკვეთის ღონისძიების დადასტურების სხდომის დაწყებამდე განაცხადა, რომ მისი მეუღლე, მაია რჩეულიშვილი პროკურორის პირადი პატიმარია.

რჩეულიშვილმა ასევე მიმართა პროკურატურას, გაათავისუფლონ კომპანიის აჭარის გაყიდვების მენეჯერი, სალომე ჩარკვიანი:

"ეს არის გეგმაზომიერი ოპერაცია, როგორც წინა არჩევნებზე განხორციელდა დექსუსის შემოგზავნით კომპანიის ერთი ნაწილის მითვისება, ახლა ამ გზით უნდათ მეორე ნაწილის. სალომე გამოუშვან, რადგან სალომეთი აიძულეს მაია, რომ ეთქვა მე ვარ ფინანსურზე ყველაფერზე პასუხისმგებელიო. სააპელაციოში კი არა, ევროპაში გასაჩივრებას ვაპირებ. პროკურორის პირადი პატიმარია მაია რჩეულიშვილი".

ცენტრ პოინტის საქმეზე დაკავებულები არიან ცენტრ პოინტის დამფუძნებელი, მაია რჩეულიშვილი და მისი შვილი, სამეთვალყურეო საბჭოს თავმჯდომარე, გუკა რჩეულიშვილი. გარდა ამისა, დაპატიმრებულები არიან კომპანიის აჭარის გაყიდვების მენეჯერი სალომე ჩარკვიანი და ცენტრ პოინტის ბათუმის საინვესტიციო პროექტის ხელმძღვანელი, ირაკლი მინდელი.

სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება.