ფარერის კუნძულები ქართველებისთვის კარგად ნაცნობი ადგილია. ჩვენი საფეხბურთო ნაკრები იქაურ გუნდს 2008 წლის ევროპის ჩემპიონატის შესარჩევში დაუპირისპირდა და 0 - 6 გაანადგურა. ეს გამარჯვება დღემდე ტკბილად გვახსოვს და ფეხბურთის ქართველი გულშემატკივარს არც ის ავიწყდება, რომ ფარერების ნაკრების მეკარე ტაქსისტი იყო, ხოლო თავდამსხმელი ფიზიკის მასწავლებელი.

ფარერის კუნძულებზე 50 ათასზე მეტი ადამიანი ცხოვრობს, რომელთა უმრავლესობასაც ძალიან უნდა, რომ კუნძულზე ბოლოს და ბოლოს Google-ის Street View-ს მანქანა ჩავიდეს და მათი კუნძული, სოფლები და ქალაქები ფოტოზე აღბეჭდოს.

Google Street View გუგლის რუკების ერთ-ერთი ფუნქციაა, რომელიც საშუალებას გაძლევთ მსოფლიოს ნებისმიერი (ფარერის კუნძულების და კიდევ რამდენიმე ადგილის გარდა) წერტილის 360 გრადუსიანი ფოტოები ნახოთ. მაგალითად, თუ Google Maps-ში მოძებნით თაიმს სქვერს, ბუკინგემის სასახლეს, ეიფელის კოშკს და ა.შ. და ჩართავთ street views შეძლებთ დაათვალიეროთ აღნიშნული ადგილები და მათი მიმდებარე ტერიტორია, გაჰყვეთ ქუჩებს და ნიუ-იორკის, პარიზის ან ლონდონის პატარ-პატარა და უცნობი კუთხეებიც ნახოთ.

გუგლის street view მონ ბლანზეც კია ხელმისაწვდომი, მაგრამ ფარერებს ვერ აღირსეს.

ამიტომ, ტურიზმის ადგილობრივმა დეპარტამენტმა ერთ-ერთ თანამშრომელს, ტურიტას, პროექტი "ჩვენ გვინდა google street view" ჩააბარა.

ფარერის კუნძულებზე უამრავი ცხვარი ჰყავთ - თითო მოსახლეზე 2 ცხოველი მოდის. ტურიტამ გადაწყვიტა ეს ფაქტი სათავისოდ გამოეყენებინა და ცხვრებს ზურგზე 360 გრადუსიანი კამერები და მზის ელემენტები დაუმაგრა.

ცხვრები მთელი კუნძულის გარშემო დაბოდიალებენ, ხოლო კამერა წუთში ერთხელ იღებს ახალ ფოტოს, რომელსაც ტურიტა Google Maps-ში ტვირთავს და კუნძულის street view-ს ავსებს.