გაეროს უშიშროების საბჭოს სხდომაზე რუსეთმა სირიის საკითხზე აშშ-ის რეზოლუციის პროექტი დაბლოკა. ამის საპასუხოდ საფრანგეთმა, დიდმა ბრიტანეთმა და აშშ-მ დაბლოკეს რუსეთის რეზოლუციის ორივე პროექტი.

13 თებერვლის შემდეგ სირიის სამთავრობო ძალები აღმოსავლეთ ღუტას რეგიონში აქტიურ საარტილერიო და ავია იერიშებს ახორციელებს.

გავრცელებული ინფორმაციით, გასულ უქმეებზე რეგიონში სირიის სამთავრობო ძალებმა ქიმიური იარაღი მშვიდობიანი მოსახლეობის წინააღმდეგ გამოიყენეს. დიდი ალბათობით, საუბარია ქლორის შემცველ მაღალ ტოქსიკურ გაზზე, ე.წ. ზარინზე. შეტევის შედეგად დაღუპულია სულ ცოტა 70 ადამიანი, მათ შორის ბევრი ბავშვია.

აშშ-ის რეზოლუცია

სხდომაზე პირველად კენჭი უყარეს აშშ-ის რეზოლუციის პროექტს, რომელიც სირიაში ქიმიური შეტევების გამოძიების ახალი მექანიზმის დანერგვას ეხებოდა. დოკუმენტის მომზადებაში მონაწილეობა მიიღეს კანადამ, საფრანგეთმა, ნიდერლანდებმა, პერუმ, პოლონეთმა, დიდმა ბრიტანეთმა, შვეიცარიამ და თურქეთმა.

დოკუმენტის პროექტი სირიაში ქიმიური თავდასხმის გამოძიებისთვის დამოუკიდებელი საგამოძიებო ორგანოს შექმნას ითვალისწინებდა. ასევე, ქიმიური თავდასხმის სავარაუდო ადგილზე, სირიის ქალაქ დუმაში, ჰუმანიტარული ორგანიზაციებისა და გამომძიებლების დაშვებას.

ამასთანავე, რეზოლუციის მიხედვით, გამოძიებას უნდა დაედგინა იყო თუ არა ქიმიური თავდასხმა და თუ იყო რომელი ნივთიერებები გამოიყენეს და ვინ დგას ყველაფრის უკან.

რეზოლუციის პროექტს მხარი 12 ქვეყანამ დაუჭირა მხარი, წინააღმდეგი იყო ორი - რუსეთი და ბოლივია. ერთმა ქვეყანამ თავი შეიკავა. რეზოლუციის პროექტი ვარდება თუ უსაფრთხოების საბჭოს ერთ-ერთი მუდმივი წევრი მაინც წინააღმდეგი იქნება, ამ შემთხვევაში იყო რუსეთი.

რეზოლუციის პროექტის განხილვისას გაეროში საფრანგეთის მუდმივმა წარმომადგენელმა, ფრანსუა დელარტმა განაცხადა, რომ ქიმიური იარაღის გამოყენება "კაცობრიობის წინაშე ჩადენილი სამხედრო დანაშაულია".

აშშ-ის მუდმივმა წარმომადგენელმა ნიკი ჰეილიმ განაცხადა, რომ ვაშინგტონი რეზოლუციით ქიმიურ თავდასხმას გმობს. მისივე თქმით, რეზოლუცია მოლაპარაკებების დროს მხარეებს შორის კომპრომისის შედეგია და რუსეთის მოთხოვნით აშშ ბევრ დათმობაზე წავიდა.

ანარქიად და მანიპულაციის მცდელობად შეაფასა რეზოლუცია რუსეთის მუდმივმა წარმომადგენელმა, ვასილი ნებენზიამ.

"რად გინდათ მექანიზმი, თუ დამნაშავეები გამოძიებამდე დაასახელეთ? გამოძიება საჭირო არაა, თქვენ არ გსურთ იმისა მოსმენა, რომ დუმაში ქიმიური თავდასხმა არ ყოფილა. თქვენ საბაბს ეძებდით, "თეთრმა ჩაფხუტიანმა" პროვოკატორებმა ის მოგცეს [ქიმიური თავდასხმის შესახებ ჰუმანიტარულმა ორგანიზაციამ განაცხადა]".

რუსეთის რეზოლუციები

რუსეთის პირველი რეზოლუციის პროექტი სირიაში ქიმიური თავდასხმის გამოძიების მიზნით გაეროში შესაბამისი მექანიზმის ჩამოყალიბებას ითვალისწინებდა. დოკუმენტის მიხედვით, რომელიც ჯერ კიდევ იანვარში მოამზადეს, საბრძოლო მოქმედებები უნდა შეწყდეს, ადგილზე გამომძიებლები უნდა დაუშვან, რომელსაც რუსეთის მხარე აარჩევს.

კენჭისყრის შედეგები: ექვსი თანახმა, შვიდი წინააღმდეგი, ორმა თავი შეიკავა.

მეორე რეზოლუციის პროექტი დუმაში გამოძიებისთვის ქიმიური იარაღის აკრძალვის ორგანიზაციის მისიის გაგზავნას ითვალისწინებს. პროექტს მხარი ხუთმა ქვეყანამ დაუჭირა, წინააღმდეგი იყო ოთხი, ექვსმა თავი შეიკავა.

დიდი ბრიტანეთის მუდმივმა წარმომადგენელმა, კარენ პირსმა განაცხადა, რომ ბრიტანეთს არ შეუძლია მხარი დაუჭიროს რუსეთის რეზოლუციას, რადგან არ უზრუნველყოფს იმის გამოძიებას, თუ ვინ იყო თავდასხმაში პასუხისმგებელი.

"რუსეთის დღევანდელი ქმედებები - უსაფრთხოების საბჭოს წესებისა და უფლებამოსილების, მათ შორის გაეროს, წინააღმდეგ გადადგმული ნაბიჯია. ეს მსოფლიო მშვიდობის, უსაფრთხოების, ასევე კაცობრიობის წინააღმდეგ გადადგმული ნაბიჯია".

ნიკი ჰეილის თქმით, აშშ რუსეთის რეზოლუციას თავიდანვე არ უჭერს მხარს, რადგან რუსეთი დუმაში ქიმიურ თავდასხმას არ აღიარებს.

ნებენზიას განმარტებით, ქიმიური იარაღის აკრძალვის ორგანიზაციის მხარდასაჭერად შემქნილი "უდანაშაულო რეზოლუციის" არმიღება ეჭვებს ბადებს.