Kantar Worldpanel-ის ახალი მონაცემების მიხედვით, ამერიკის ბაზარზე iPhone-ის გაყიდვების რიცხვმა იკლო. გაყიდვების ანალიზის შემდეგ დადგინა, რომ ამერიკელ მომხმარებელთა 16 პროცენტი Galaxy S7-ს ან S7 Edge-ს ყიდულობს, ხოლო iPhone-ს - 14,6 პროცენტი.

სამთვიანი კვლევის შედეგად, რომელიც მაისში დასრულდა, Kantar-მა დაადგინა, რომ სამსუნგი ამერიკული ბაზრის ლიდერია, ბაზრის 37 პროცენტიანი წილით, იმავე კატეგორიაში ეფლს 29 პროცენტიანი მაჩვენებელი აქვს.

ეფლი ლოიალურობაში ლიდერობს - iPhone-ის მომხმარებელთა 88 პროცენტი ამბობს, რომ აუცილებლად შეიძენს მომდევნო მოდელის სმარტფონსაც. ამ მაჩვენებლით სამსუნგი ეფლს სულ ცოტათი ჩამორჩება - მისი მომხმარებლის 86 პროცენტი სხვა ბრენდის სმარტფონის ყიდვას არ აპირებს.

აშკარაა, რომ სამსუნგის გაუმჯობესებული კამერა და მონაცემები გაყიდვებზეც აისახება. თუმცა, ბრენდის წარმატების ერთ-ერთი მიზეზი ისაა, რომ 2016 წლის ახალი მოდელები ბაზარზე პირველებმა შემოიტანეს და ყველა კონკურენტს დაასწრეს.