ერთ-ერთი შავკანიანი, რომელსაც გუშინ, 8 აპრილს თბილისში, დიღმის მასივში სტადიონთან ადგილობრივმა მაცხოვრებლებმა ფიზიკური და სიტყვიერი შეურაცხყოფა მიაყენეს, პოლიციისგან უსაფრთხოების დაცვას მოითხოვს. ამის შესახებ ის ფეისბუქზე წერს.

მისი თქმით, ფეხბურთის თამაშის დროს მათთან კაცი მივიდა, რომელმაც სტადიონის დატოვება მოსთხოვა და დასძინა, რომ იმის გამო, რომ შავკანიანები იყვნენ მათ არ აქვთ ამ ქვეყანაში ყოფნის უფლება.

"მეორე ქართველი ფანჯრიდან იარაღით გვემუქრებოდა, თუ არ დავტოვებდით ადგილს მოგვკლავდა", - აღნიშნავს ის.

მისვე თქმით, მათ პოლიცია გამოიძახეს, რომელსაც გადაღებული ვიდეო აჩვენეს, თუმცა მათ არავინ დააკავეს და უთხრეს, რომ მომხდარისა და ინციდენტში მონაწილე პირების "დაევიწყებინათ".

"შავკანიანებს რომ მიეყენებინათ შეურაცხყოფა ქართველებისთვის, ექნებოდა პოლიციას ასეთი არაჯანსაღი დამოკიდებულება?" - წერს ის.

ამავე სტუდენტმა გუშინ, 8 აპრილს ფეისბუქზე ვიდე გაავრცელა, რომელსშიც ჩანს, რომ ქართულად მოლაპარაკე ადამიანები შავკანიანებს ფიზიკურად უსწორდებიან და სიტყვიერ შეურაცხყოფას აყენებენ.

მომხდარის შესახებ განსხვავებულ ვერსიას ავრცელებს ფეისბუქგვერდზე - "იბერიული ერთობა", რომელიც წერს, რომ შავკანიანები "ქართველებს" თამაშის დროს შეუვარდნენ და მოედნის დათმობას ითხოვდნენ.

"საბედნიეროდ, მოხდა ის, რაც უნდა მომხდარიყო. მიგრანტებმა მიიღეს საკადრისი პასუხი და მოედანი და მიმდებარე ტერიტორია ქართველებმა დაატოვებინეს! როგორც ხედავთ დაიწყეს უკვე საქართველოშიც მსგავსი ქმედებები ღიად. ჯერ ევროპას უღებენ ბოლოს და ბევრიც არ დარჩენია და ახლა საქართველოსაც მოადგნენ. ჩვენ მხოლოდ ერთ რამეს ვიტყვით", - ამ შინაარსის დისკრიმინაციული განცხადება წერია იბერიული ერთობის ფეისბუქგვერდზე.

შინაგან საქმეთა სამინისტრო საქმეს სისხლის სამართლის კოდექსის 126-ე მუხლით იძიებს. ამ მუხლით, სისტემატური ცემა ან სხვაგვარი ძალადობა, რამაც დაზარალებულის ფიზიკური ან ფსიქიკური ტანჯვა გამოიწვია ისჯება თავისუფლების აღკვეთით ერთიდან სამ წლამდე. უწყებაში არ აკონკრეტებენ კონკრეტულად რომელი ჯგუფის წევრების ცემას იძიებენ.