სან-ბრუნოში, YouTube-ის სათავო ოფისში სროლაა. როგორც სან ბრუნოს პოლიცია ტვიტერზე წერს, შენობიდან ცხელ ხაზზე რამდენიმე ზარი განხორციელდა. ამჟამად სათავო ოფისთან მობილიზებულია პოლიცია და ორმხრივი ცეცხლია გახსნილი.

როგორც CNN წერს, YouTube-ის ერთ-ერთმა თანამშრომელმა განაცხადა, რომ ადამიანები შენობის დატოვებას ცდილობდნენ. ის შეხვედრაზე იმყოფებოდა, როცა მენეჯერმა, რომელმაც სროლას ყური მოჰკრა, უთხრა, რომ მინიმუმ ერთი ადამიანი დაიჭრა ვერანდაზე.

ოთხი ან ხუთი დაშავებული სასწრაფომ საავადმყოფოებში გადაიყვანა. ჯერჯერობით უცნობია, არიან თუ არა სროლის შედეგად დაღუპულები.

Youtube-ის სათავო ოფისი სან-ფრანცისკოდან 16 კილომეტრითაა დაშორებული. კომპანიას რამდენიმე ასული თანამშრომელი ჰყავს. დაუდგენელია, მათგან რამდენი მუშაობს სათავო ოფისში.

რას წერენ Youtube-ის თანამშრომლები ტვიტერზე

ვადიმ ლავრუსკიმ, რომელსაც პირად ინფორმაციაში დასაქმების ადგილად Youtube აქვს მითითებული, ტვიტერზე დაწერა, რომ სროლის ხმა მოესმა და დაინახა, როგორ გარბოდნენ მისი კოლეგები. 20 წუთის შემდეგ კი დაწერა, რომ შენობიდან გამოსვლა მოახერხა.

პროდუქტების მენეჯერი ტოდ შერმანი წერს, რომ შეხვედრაზე იჯდა, როცა ხალხის ხმაური მოესმა. ის ასევე ირწმუნება, რომ კიბეებზე და იატაკზე სისხლი დაინახა.

განახლება:

სროლის შედეგად მინიმუმ სამი ადამიანი დაიჭრა. როგორც თვითმხილველები იტყობინებიან, სავარაუდო მსროლელი, ქალი, კამპუსში მკვდარი იპოვეს. პოლიციის უფროსმა განაცხადა, რომ მან, სავარაუდოდ, თავი მოიკლა.

შემთხვევას FBI გამოიძიებს.

განახლება:

თვითმხილველი ირწმუნება, რომ თავდამსხმელმა ათჯერ მაინც გაისროლა. ამ დროს Youtube-ის სათავო ოფისში წვეულება იწყებოდა.

განახლება: აშშ-ს პრეზიდენტი დონალდ ტრამპი ტვიტერზე გამოეხმაურა სროლებს და განაცხადა, რომ მადლობას უხდის სამართალდამცავებს ოპერატიულად მუშაობისათვის.

FBI მომხდარს ტერორისტულ აქტად არ აფასებს.