BMW მომავალი წლიდან ბაზარზე ელექტრო მობილების გამოშებას გეგმავს. მათ შორის იქნება ერთ-ერთი ყველაზე პოპულარული სერიის, მინი კუპერის ხაზის მანქანებიც. კომპანიის გადაწყვეტილებით, ერთ-ერთი პირველი მოდელი, რომელსაც ელექტრო ძრავი ექნება, კლასიკური მინი კუპერი იქნება.

კლასიკური მინი კუპერი პირველად 1959 წელს British Motors Corporation-მა შექმნა და 1960-იანი წლების ერთ-ერთი ყველაზე პოპულარული მანქანა იყო. მის თანამედროვე ვერსიაში მთლიანად იქნება დიზაინერული შტრიხები შენარჩუნებული და ვიზუალურად ზუსტად მისი წინაპრის ანალოგი იქნება. ერთადერთი მნიშვნელოვანი ცვლილება იქნება ის, რომ ოთხ ცილინდრიანი ძრავის ნაცვლად, მანქანას ელექტრო ძრავი ექნება.

ფოტო: BMW

ფოტო: BMW

"კლასიკური მინი კუპერის ელექტრო ვერსიაში გაერთიანებულია მისი ისტორიული წარსული და თანამედროვე ურბანული ცხოვრების მოთხოვნილებები. ეს მოდელი არის ნათელი მაგალითი, თუ როგორ შეიძლება მანქანამ დროში ისე იმოგზაუროს, რომ თანამედროვეობის გამოწვევებსაც უპასუხოს", - ნათქვამია ოფიციალურ განცხადებაში.

ფოტო: BMW

ფოტო: BMW

BMW-მ უკვე დაიწყო მანქანის წარმოებაზე მუშაობა და ის, სავარაუდოდ, 2019 წელს გამოვა.

გარდა ამისა, BMW-მ 2017 წლის აგვისტოში მინი კუპერის ელექტრო მობილების სამომავლო კონცეფციაც წარმოადგინა, რომელმაც დიდი მოწონება დაიმსახურა.

BMW არ არის ერთადერთი, ვინც კლასიკური მოდელების გაცოცხლება დაიწყო. პირველი, ვინც კლასიკური მანქანის ელექტრო მობილი წარმოადგინა Jaguar-ი იყო. მისი პრეზენტაცია 2017 წლის სექტემბერში შედგა.