თბილისის მერის, კახა კალაძის თქმით, სითი ინსტიტუტს გენგეგმის შესამუშავებლად, აღებული ვალდებულებების შესასრულებლად ვადას პირველ ივნისამდე აძლევენ. ამის შესახებ კალაძემ რამდენიმე წუთის წინ ბრიფინგზე განაცხადა.

"იქედან გამომდინარე, რომ გენერალური გეგმის არსებობა თბილისისთვის არის უმნიშვნელოვანეს და პირადად ჩემთვის, როგორც დედაქალაქის მერისთვის. მივიღეთ გადაწყვეტილება დავასრულებინოთ სითი ინსტიტუტს თავისი ვალდებულების შესრულება. ჩვენ გვაქვს მოლოდინი და ყველანაირად ხელს შევუწყობთ მერიის ყველა სამსახური, რომ სითი ინსტიტუტმა წარმოადგინოს ქმედითი, გრძელვადიან პერსპექტივაზე გათვლილი მასალა", - თქვა კალაძემ.

ბოლო რამდენიმე დღეა თბილისის მერია და სითი ინსტიტუტი თბილისის გენგეგმის პრეზენტაციას მართავენ. თბილისის მერიას შემუშავებული დოკუმენტი არ მოსწონს და ჰგონია, რომ მისი მიღება არ შეიძლება. საწინააღმდეგო აზრი აქვთ გენგეგმის ავტორებს.