პატრიოტთა ალიანსის ლიდერი, ირმა ინაშვილი საქართველოს პრემიერ-მინისტრს, გიორგი კვირიკაშვილს საქართველოდან რუსი დიპლომატის გაძევების შემდეგ მიმართავს. ამის შესახებ ინაშვილმა განცხადება გაავრცელა.

"საქართველო-რუსეთს შორის ვითარება დღეს იმდენად დაძაბულია, რომ თქვენ, საქართველოს პრემიერი ვალდებული ხართ, სასწრაფოდ გააკეთოთ კიდევ ერთი განცხადება რუსეთის ხელისუფლებისადმი და ყველა ღონეს მიმართოთ იმისათვის, რომ განეიტრალდეს დაძაბული, კრიტიკული ვითარება. თქვენი ვალია, - ახალი ომის და სამხედრო დაპირისპირების საფრთხე აარიდოთ ქვეყანას", - აღნიშნა ინაშვილმა.

ინაშვილი მოითხოვს, მათი პარტიის დელეგაცია, რომელიც მოსკოვში დუმის დეპუტატებს ხვდებიან ოფიციალური დელეგაციის სტატუსი მიეცეთ.

"რომ ჩვენ, ქართველი დეპუტატები, საქართველის პარლამენტის სახელით ვმართავდეთ შეხვედრებს რუს დეპუტატებთან!" - ამბობს ინაშვილი.

მას მიაჩნია, რომ დღეს საქართველო ახალი ომის საფრთხის წინაშე დგას.

"ჩვენი ვალია,- ეს საფრთხე ავიცილოთ თავიდან. ამისი გაკეთება შეიძლება მხოლოდ ცივი გონებით, მშვიდი სიტყვით და არა ცხელი თავებით და რუსეთის დაუსრულებელი ლანძღვა-გინებით", - განმარტავს ის.

საქართველომ გუშინ, 29 მარტს დიდი ბრიტანეთის მხარდასაჭერად ერთი დიპლომატი გააძევა. საქართველო ერთ-ერთია იმ ქვეყნებს შორის, რომელმაც ქვეყნიდან რუსი დიპლომატები გააძევა.

ბრიტანეთის მხარდასაჭერად, საერთო ჯამში, აშშ-დან, კანადიდან და ევროპის ქვეყნებიდან 150-ზე მეტი რუსი დიპლომატი გააძევეს. რუსული მისიის დიპლომატების რიცხვი შეამცირა ნატომაც. სკრიპალის სკანდალის გამო რუსეთიდან დროებით გაიწვია თავისი ელჩი ევროკავშირმაც.

რუსეთი ბრალდებებს უარყოფს და ამბობს, რომ ამ დრომდე სკრიპალების საქმის დეტალებს არ იცნობს და ლონდონს ცილისმწამებლური პოზიცია უჭირავს. მოსკოვმა ლონდონის ნაბიჯების საპასუხოდ, ქვეყნიდან 23 ბრიტანელი დიპლომატი გააძევა.