რუსეთის საგარეო საქმეთა სამინისტროს ოფიციალური წარმომადგენელი, მარია ზახაროვა სკრიპალის საქმეზე დიდი ბრიტანეთის ქმედებებს გლობალურ საერთაშორისო პროვოკაციას უწოდებს.

"კიდევ ერთხელ მინდა აღვნიშნო, რომ სხვანაირად, თუ არა პროვოკაციად ლონდონის ქმედებებს ვერ შევაფასებთ", - განაცხადა ზახაროვამ.

რუსი დიპლომატების გაძევება

ყოფილი რუსი ჯაშუში სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს. ბრიტანეთის ოფიციალური პოზიციით, საქმეში რუსეთი მონაწილეობს.

ბრიტანეთის მხარდასაჭერად, საერთო ჯამში, აშშ-დან, კანადიდან და ევროპის ქვეყნებიდან, მათ შორის საქართველოდან, სულ 20-ზე მეტი ქვეყნიდან 150-ზე მეტი რუსი დიპლომატი გააძევეს. რუსული მისიის დიპლომატების რიცხვი შეამცირა ნატომაც. სკრიპალის სკანდალის გამო რუსეთიდან დროებით გაიწვია თავისი ელჩი ევროკავშირმაც.

რუსეთი ბრალდებებს უარყოფს და ამბობს, რომ ამ დრომდე სკრიპალების საქმის დეტალებს არ იცნობს და ლონდონს ცილისმწამებლური პოზიცია უჭირავს. მოსკოვმა ლონდონის ნაბიჯების საპასუხოდ, ქვეყნიდან 23 ბრიტანელი დიპლომატი გააძევა.