ყოფილი პროკურორის, მილენა მითაიშვილის საქმეზე ყოფილი ქმარი, რივერა ბენდელიანი, მისი ადვოკატი და ბავშვის ძიძა პასუხისგებაში მისცეს. საქართველოს პროკურატურის ინფორმაციით, საქმეზე გამოძიება პირადი ცხოვრების ამსახველი ინფორმაციის ხელყოფის მუხლით მიმდინარეობს.

უწყების ინფორმაციით, გამოძიებით დადგინდა, რომ ყოფილ პროკურორს ყოფილმა ქმარმა, რივერა ბენდელიანმა თანაცხოვრების დროს მობილური ტელეფონის საშუალებით უკანონოდ გადაუღო პირადი ცხოვრების ამსახველი ვიდეო.

პროკურატურის განმარტებით, 2017 წელს რივერა ბენდელიანმა ფეისბუქში მილენა მითაიშვილის პირადი ცხოვრების ამსახველი ვიდეოცანაწერი გაავრცელა. ხოლო ძიძამ აღნიშნული ვიდეო 2017 წლის 6 დეკემბერს გააზიარა მილენა მითაიშვილის შეურაცხმყოფელი ტექსტით. პროკურატურის ინფორმაციით იგივე ვიდეო 2017 წლის პირველ თებერვალს ფეისბუქში განათავსა ბენდელიანის ადვოკატმაც.

"პირადი ცხოვრების ამსახველი ვიდეოჩანაწერის სოციალურ ქსელში უკანონო გავრცელებამ გამოიწვია მილენა მითაიშვილს პირადი ღირსების შეურაცხყოფა და მიადგა მორალური ზიანი", - აღნიშნულია პროკურატურის განცხადებაში და დასძენენ, რომ წარდგენილი ბრალდება სასჯელის სახედ და ზომად თავისუფლების აღკვეთას ოთხიდან შვიდ წლამდე ვადით ითვალისწინებს.

პროკურატურაში საქმეზე გრძელდება გამოძიება.