ჟენევის საერთაშორისო დისკუსიების 43-ე რაუნდის მონაწილეებმა ძალის გამოუყენებლობის შესახებ ერთობლივი განცხადება ვერ მიიღეს. მხარეები განცხადების ტექსტზე ვერ შეთანხდნენ.

საქართველოს საგარეო საქმეთა მინისტრის მოადგილის, დავით დუნდუას განცხადებით, რუსეთმა კონსტრუქციულ მსჯელობას თავი აარიდა.

"ამით რუსეთმა კითხვის ნიშნის ქვეშ დააყენა ცეცხლის შეწყვეტის შესახებ ის შეთანხმება, რომელსაც ხელი მოეწერა 2008 წლის 12 აგვისტოს. ყოველივე ამის შემდეგ რთული იყო საგნობრივი მსჯელობა ერთიან განცხადებასთან დაკავშირებით, ასე რომ, ამ რაუნდზე წინ ვერაფრით წავიწიეთ", - თქვა დავით დუნდუამ.

რუსეთის ფედერაციის საგარეო საქმეთა მინისტრის მოადგილის გრიგორი კარასინის განცხადებით, დისკუსიის მონაწილეებს განსხვავებული წარმოდგენა აქვთ თუ რისი ჩაწერაა საჭირო ტექსტში. თარგმანს რუსთავი 2 ავრცელებს.

"აქცენტი კეთდება სტატუსზე და 2008 წლის შეთანხმებაზე, რაც ასევე განსხვავებულად ესმით თბილისში, სოხუმი, ცხინვალში, მოსკოვსა და სხვაგან", - განაცხადა გრიგორი კარასინმა შეხვედრის დასრულების შემდეგ.

რუსეთის ფედერაციამ არჩილ ტატუნაშვილის მკვლელობის ფაქტზე პოლიტიკური პასუხისმგებლობა არ აიღო.

გრიგორი კარასინის თქმით, სირთულის მიუხედავად, დიალოგი კონსტრუქციული იყო, თუმცა დრო და დრო ემოციურიც.

"განვიხილეთ არასასიამოვნო, სერიოზული და ტრაგიკული შემთხვევები, რომლებიც პერიოდულად ხდება ჩვენს ცხოვრებაში, ვგულისხმობ საქართველოს მოქალაქის ტატუნაშვილის გარდაცვალებას, გავიხსენეთ ოთხოზორიას საქმეც და დეტალური საუბარი იყო საქართველოს, სამხრეთ-ოსეთისა და აფხაზეთის წარმომადგენლებს შორის", - თქვა კარასინმა.

ჟენევაში მეორე დღეა მოლაპარაკებების 43-ე რაუნდი მიმდინარეობს. მასში მონაწილეობას იღებენ საქართველოს, რუსეთის, შეერთებული შტატების, ევროკავშირის, ოკუპირებული აფხაზეთისა და ოკუპირებული სამხრეთ ოსეთის დეფაქტო ხელისუფლების წარმომადგენლები.