პოლონეთმა დღეს, 28 მარტს თავის ისტორიაში ყველაზე ძვირადღირებული სამხედრო ტექნიკა შეიძინა. ამის შესახებ ინოფრმაციას Reuters ავრცელებს.

ამერიკის შეერთებული შტატებისგან 4,75 მილიარდი დოლარის ღირებულების ოთხი ცალი რაკეტსაწინააღმდეგო სისტემის, Patriot-ის შეძენის გადაწყვეტილებას ხელი პოლონეთის თავდაცვის მინისტრმა, მარიუშ ბლაშჩაკმა ვარშავაში მოაწერა.

ხელმოწერის ცერემონიაზე მყოფმა პოლონეთის პრეზიდენტმა, ანჯეი დუდამ ამ შეთანხმებას ისტორიული უწოდა და განაცხადა, რომ Patriot-ის შეძენა პოლონეთისთვის ახალ სამხედრო ერაში შესვლას ნიშნავს.

პოლონეთმა სამხედრო მოდერნიზაცია 2014 წლიდან დაიწყო. პოლონეთის მთავრობის განცხადებით, მოდერნიზაციის მთავარი მიზეზი რუსეთის მიერ ყირიმის ოკუპაცია და რეგიონში მისი ექსპანსიონისტური პოლიტიკის გაძლიერება იყო.

სამხედრო მოდერნიზაციისა და რუსეთის ექსპანსიის პრევენციის პროცესში Patriot-ის განლაგება პოლონეთის ტერიტორიაზე საკვანძო ნაბიჯად მიიჩნევა. კრემლს არაერთხელ გამოუთქვამს თავისი მკვეთრად უარყოფითი პოზიცია პოლონეთის მიერ საკუთარ ტერიტორიაზე ამერიკული რაკეტსაწინააღმდეგო სისტემის განლაგების თაობაზე.