რუსეთის ქალაქ კემეროვოში, სადაც კვირას, 25 მარტს სავაჭრო ცენტრში ხანძარი გაჩნდა, მოსახლეობა საპროტესტო აქციას მართავს. მოსახლეობის აზრით, ხანძრის დროს 300-ზე მეტი ადამიანი დაიღუპა და ადგილობრივი მთავრობა დაღუპულთა რეალურ რიცხვს არ ასახელებს. ოფიციალური მონაცემებით, ხანძრის შედეგად 64 ადამიანი გარდაიცვალა.

RTVI-ის ინფორმაციით, დაღუპულთა ოჯახის წევრებს გაუთქმელობის ხელწერილს აწერინებენ, სხვა შემთხვევაში ცხედრის ამოსაცნობად არ უშევებენ. გამოცემის თქმით, ამის შესახებ რამდენიმე თვითმხილველი ჰყვება.

კემეროვის ოლქის ვიცე-გუბერნატორი განცხადებით, ინფორმაცია ასეულობით დაღუპულის შესახებ ტყუილია:

"მათ, ვინც ამ ინფორმაციას ავრცელებს, ცილისწამებისთვის პასუხი უნდა აგონ".

25 მარტს კემეროვში სავაჭრო ცენტრ ზიმნიაი ვიშნიაში, ბოლო ინფორმაციით, 64 ადამიანი გარდაიცვალა, მათგან უმეტესობა ბავშვია. რამდენიმე ადამიანს ამ დრომდე ეძებენ. გამოძიების ფარგლებში უკვე დააკავეს ოთხი ადამიანი.

საპროტესტო აქციაზე შეკრებილებმა ადგილობრივი მთავრობის გადადგომაც მოითხოვა. ისინი ასევე, პრეზიდენტ ვლადიმერ პუტინთან შეხვედრას ითხოვენ, რომელიც კემეროვში 27 მარტს, დილით ჩავიდა.