რესპუბლიკური პარტიის წევრის, დავით ზურაბიშვილის განცხადებით, მის შვილს, გიორგი ზურაბიშვილის ნარკოპოლიტიკის კრიტიკის გამო ემუქრებიან. პოლიტიკოსს ფიქრობს, რომ ეს ძალოვანი სტრუქტურების კამპანიაა. ამ შინაარსის პოსტსა და შეტყობინებების ფოტოებს ზურაბიშვილი ფეისბუქზე აქვეყნებს.

რესპუბლიკური პარტიის წევრი, საქმის გამოძიებას შინაგან საქმეთა სამინისტროსა და სახელმწიფო უსაფრთხოების სამსახურისგან ითხოვს.

"პრობლემა პრობლემად და რაც გიორგის მიერ მისი მეგობრის პატიმრობის გაპროტესტებას მოჰყვა, ის უკვე საერთოდ არაფერში არ ჯდება. მისი ფოსტა ორი დღეა წაილეკა ანონიმი და ე. წ. ფეიკ-ექაუნთების მქონე პირების მხრიდან ლანძღვა-გინებით და მუქარებით. თან ეს ხალხი იგინება და იმუქრება პოლიციის და ხელისუფლების სახელით", - აღნიშნავს დავით ზურაბიშვილი.

გიორგი ზურაბიშვილმა ფეისბუკზე მამუკა ბერძენიშვილის რვაწლიანი განაჩენი გააკრიტიკა. როგორც ზურაბიშვილმა დღეს, 22 მარტს, სასამართლოს გადაწყვეტილების გაკრიტიკების მეორე დღეს ფეისბუქზე დაწერა, მას ნარკოპოლიტიკის კრიტიკის გამო ანონიმური ექაუნთებიდან ლანძაღავენ და ემუქრებიან.

"მსგავსი აგრესია და ლანძღვა-გინება პოლიციის სახელით არ არის პირველი შემთხვევა და პერიოდულად ხორციელდება ხოლმე სწორედ იმ ადამიანების მიმართ, ვინც მტკიცედ და მკვეთრად აკრიტიკებს არსებული ნარკოპოლიტიკის არაადამიანურ პრაქტიკას", - წერს დავით ზურაბიშვილი ფეისბუკზე და აღნიშნავს, რომ ეს გარემოება ძალოვანი სტრქტურების ქმედებებზე აფიქრებინებს.

On.ge შინაგან საქმეთა სამინისტროდან პასუხს ელოდება. თუმცა გიორგი ზურაბიშვილი ფეისბუკზე წერს, რომ გენერალური ინსპექციიდან მას უკვე დაუკავშირდნენ.

მამუკა ბერძენიშვილის საქმე

თბილისის საქალაქო სასამართლომ მამუკა ბერძენიშვილს MDMA-ის 2,027447 გრამის ფლობისთვის რვაწლიანი პატიმრობა მიუსაჯა. აღნიშნული რაოდენობა დღევანდელი კანონმდებლობით განსაკუთრებით დიდ ოდენობად მიიჩევა.

სასამართლოს განმარტებით, ბერძენიშვილს წარსულში უკვე ჰქონდა ნარკოდანაშაული ჩადენილი.