პრეზერვატივების ქართული ბრენდი აიისა საქართველოს საპატრიარქოს კრიტიკას პასუხობს და სამომავლო თანამშრომლობას სთავაზობს.

"მადლობას ვუხდით საქართველოს საპატრიარქოს ინტერესის გამოხატვისთვის და პრეზერვატივების ბაზარზე არჩევანის ქართულ ბრენდზე გაკეთებისთვის."

მათი განცხადებით, მზად არიან სექსუალური განათლების და სხვა საკითხებზე საპატრიარქოსთან ითანამშრომლონ:

"ვიმედოვნებთ უახლოეს მომავალში შედგება აიისას, როგორც ბრენდის და საქართველოს საპატრიქრქოს თანამშრომლობა ისეთ სოციალურ საკითხებში როგორებიცაა სექსუალური განათლების პროგრამები, ძალადობა და ვენერიული დაავადებების პრევენცია."

კომპანიაში ამბობენ, რომ მათი ინსპირაციის წყარო ნებისმიერი მოვლენა შეიძლება გახდეს, რაც გამოარჩევს ბრენდს. ამიტომ მოუწოდებენ საზოგადოებას მეტი მიმღებლობა გამოიჩინონ და აზრი ძალადობის გარეშე გამოხატონ.

საპატრიარქო აცხადებს, რომ ბოლო დროს მორწმუნე საზოგადოების გრძნობების შეურაცხყოფისა და ღვთის გმობის გამოვლინებები გაძლიერდა. მათ განცხადებაში მაგალითად მოყვანილია კომპანია აიისას პრეზერვატივის დიზაინი, რასაც საპატრიარქო "უზნეო თავგასულობას" უწოდებს.

საპატრიარქო აღიარებს, რომ გამოხატვის თავისუფლება, წარმოადგენს ფასეულობას, რომელიც დემოკრატიული საზოგადოების განვითარებისა და ადამიანის უფლებების დაცვის ერთ-ერთი მთავარი გარანტია. თუმცა, აღნიშნავს, რომ ამ უფლებით სარგებლობა დაკავშირებულია პასუხისმგებლობასთან და სხვისი უფლებებისა და თავისუფლების დაცვასთან.