შსს-მ ტელეკომპანია რუსთავი 2-თან გუშინ მომხდარი ინციდენტის გამო ნეო-ნაცისტური დაჯგუფების, ქართული მარშის წევრი ლადო სადღობელაშვილი დღეს, გამოკითხვის შემდეგ დააკავა.

შინაგან საქმეთა სამინისტროს განცხადებით, 19 მარტს, რუსთავი 2-თან მომხდარ ფაქტთან დაკავშირებით ლადო სადღობელაშვილი საქართველოს სისხლის სამართლის კოდექსის 239-ე მუხლის მე-2 ნაწილის ა ქვეპუნქტით დააკავეს, რაც წინასწარი შეთანხმებით ჯგუფის მიერ ხულიგნობას გულისხმობს.

დანაშაული 2-დან 5 წლამდე თავისუფლების აღკვეთას ითვალისწინებს.

შსს-ს ცნობით, ამავე საქმეზე სამართალდამცველების კითხვებს გუშინდელი დაპირისპირების მონაწილე პირები: მ.ა. ვ.ს. ი.დ. და გ.ო. ამ წუთებში პასუხობენ.

19 მარტს, რუსთავი 2-ის ოფისის ეზოში შენობასთან შეკრებილმა ნეო-ნაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

ტელეკომპანია რუსთავი 2-ის შენობასთან ქართული მარშის 6 წევრი დააკავეს.