ცენტრ-პოინტის ერთ-ერთი დამფუძნებელი ვახტანგ რჩეულიშვილი, რუსთავი 2-თან საუბრისას, კომპანიის ხელმძღვანელების დაკავებას არჩილ კბილაშვილს უკავშირებს და აცხადებს, რომ ამ საქმეზე სასამართლო პროცესი წლებია მიმდინარეობს:

"ცენტრ-პოინტის საქმის გამოძიებით ჩვენც ვართ დაინტერესებულები. ერთი თვის წინ ჩვენ მივმართეთ პროკურატურას, რომ ყველაფერს - ამ პროვოკაციას ცენტრ პოინტის წინააღმდეგ ამტკიცებს ის, რომ არჩილ კბილაშვილი, ვინც გასცა ეს ორდერი და სანქცია, იყო ცენტრ პოინტის საქმიანი პარტნიორი. ამას მოჰყვა ის, რომ არჩილ კბილაშვილმა მოაწერა ხელი რუსუდანის და მაიას წინააღმდეგ სანქციას".

ცენტრ-პოინტის ადვოკატმა მამუკა ჭაბაშვილმა, განაცხადა, რომ გაუგებარია პროკურატურისა და სასამართლოს გადაწყვეტილება, რადგან მისივე განმარტებით, ცენტრ-პოინტის საქმეზე უკვე 4 წელია გამოძიება მიმდინარეობს და ინტენსიური ურთიერთობა ჰქონდათ გამოძიებასთან.

მედიაში გავრცელებული ინფორმაციით, დღეს, ჩიტაძის ქუჩაზე მდებარე საცხოვრებელ სახლში პროკურატურის წარმომადგენლები სასამართლოს განჩინებით, გუკა რჩეულიშვილის დასაკავებლად მივიდნენ, თუმცა ის სახლში არ დახვდათ. მთავარ პროკურატურაში მისი დაკავების ფაქტს უარყოფენ და როგორც ამბობენ, დაკავების ოპერაციის შესახებ ინფორმაციას არ ფლობენ.

პროკურატურა On.ge-სთან საუბარში ადასტურებს, რომ დაკავებულები არიან ცენტრ-პოინტის ბათუმის საინვესტიციო პროექტის ხელმძღვანელი ირაკლი მინდელი და გაყიდვების მენეჯერი სალომე ჩარკვიანი.

პრესსამსახურის ცნობით, დაკავების მიზეზებზე ვრცელ განცხადებას ხვალ, 11 ივლისს გამოაქვეყნებენ.