უნდა ჩატარდეს თუ არა ე.წ. ვადამდელი საპრეზიდენტო არჩევნები? - ამ კითხვაზე პასუხის გასაცემად დღეს ოკუპირებულ აფხაზეთში რეფერენდუმი მიმდინარეობს. ხმის მიცემა დილის 8 საათიდან დაიწყო და 20:00 საათამდე გაგრძელდება.

იმისთვის, რომ რეფერენდუმი შედგეს, საკუთარი პოზიცია ამომრჩეველთა 50%-მა უნდა დააფიქსიროს.

რამდენიმე დღის წინ, სოხუმში აქცია გაიმართა, რომლის მონაწილეებიც რაულ ხაჯიმბას მიერ 10 ივლისს დანიშნული რეფერენდუმის შემოდგომაზე გადატანასა და შინაგან საქმეთა მინისტრის, ლეონიდ ძაპშბას გადაყენებას ითხოვდნენ.

ძაპშბას ბრალი ედება მუქარაში, რომლითაც მან თავისი ოჯახის წევრები და ნათესავები გააფრთხილა, რომ თუ საპრეზიდენტო რეფერენდუმში მონაწილეობას მიიღებდნენ, შესაბამის ზომებს მიმართავდა.

დე-ფაქტო ხელისუფლების პრეზიდენტმა ძაპშბა თანამდებობიდან დროებით გაათავისუფლა, ოპოზიციის წარმომადგენლების მოთხოვნაზე, რეფერენდუმის თარიღის შეცვლასთან დაკავშირებით, უარი განაცხადა. ხაჯიმბამ განმარტა, რომ რეფერენდუმის ჩატარებასთან დაკავშირებული გადაწყვეტილება მოსახლეობის გასაერთიანებლად მიიღეს.

ხაჯიმბა დე-ფაქტო აფხაზეთის პრეზიდენტად 2014 წლის აგვისტოში აირჩიეს, ალექსანდრე ანქვაბის გადადგომიდან 2 თვის შემდეგ.